▪︎စစ်ကောင်စီလက်နက်ကြီးမှန်၍ ပြည်သူအချို့သေဆုံးပြီး ဒဏ်ရာရအဘွားအိုတစ်ဦးကို စစ်တပ်ကဆေးကုသခွင့်မပေး
လွိုင်ကော်မြို့နယ်၊ ပဒါးညေးကျေးရွာ တိုက်ပွဲ ၌ ဒေသခံပြည်သူများကို စစ်ကောင်စီက လူသားဒိုင်း အဖြစ်ဖမ်းဆီးအသုံးပြုကြောင်း ကရင်နီစစ်ရေး သတင်းရင်းမြစ်များက ပြောသည်။
ယမန်နေ့(ဇူလိုင် ၂၀ ရက်) နံနက်အစောပိုင်းကစ၍ ညနေပိုင်းအထိ တိုက်ပွဲပြင်းထန်ခဲ့ပြီးစစ်ကောင်စီကလက်နက်ကြီး ပစ်ကူများစွာသုံးစွဲ ခဲ့ရသည်ဟု သိရသည်။
“လက်နက်ကြီးထိလို့ ၁၆ နှစ်ကလေး တစ်ယောက်သေသွားသလို အသက် ၇၀ ကျော်အဘွားတစ်ယောက် လည်း ဒဏ်ရာပြင်းထန်ရထားတယ်လို့သိရတယ်။သူတို့ကို လွိုင်ကော်ဆေးရုံလည်း ပို့ခွင့် မပေးသလို လူမှုကူညီရေးအသင်းကားကိုလည်း လာခေါ်ခွင့် မပေးဘူး။ နောက်ပြီး အခု ရွာထဲ ကျန်ခဲ့တဲ့ ဒေသခံ ၂၀ ကျော်လောက်ကိုပါ လူသားဒိုင်းကာအနေနဲ့ စကစ ဘက်က အသုံးပြုထားတယ်”ဟု ကရင်နီ စစ်ရေးသတင်းရင်း မြစ်ကပြောသည်။
လက်ရှိတွင် ပဒါးညေးကျေးရွာ ဘုန်ကြီးကျောင်း၌ စစ်ကောင်စီက တပ်စွဲထားကြောင်းသိရသည်။
“အင်အား ၁၀၀ လောက်ပါတယ်။သူတို့ဘက်က စ ပြီး စစ်ကြောင်းဝင်လာရင်း ထိတွေ့မှု ဖြစ်တာ။တိုက်ပွဲ အခြေအနေတော့မသိရသေးဘူး။ဒါပေမယ့်အရပ်သားတချို့ လက်နက်ကြီးမှန်ပြီး သေတယ်လို့ ကြားတယ်”ဟု လွိုင်ကော်အခြေစိုက် ကရင်နီအမျိုးသား များကာကွယ်ရေးတပ်ဖွဲ့ဝင်တစ်ဦးက ပြောသည်။
လွိုင်ကော်-မိုးဗြဲ နှင့် လွိုင်ကော် -ဆီဆိုင်လမ်းမကြီး၌ အချိန်မရွေးတိုက်ပွဲ ဖြစ်နိုင်ကြောင်း ကရင်နီအမျိုးသားများကာကွယ်ရေးတပ် KNDF တပ်ရင်း( ၂ )က ယခုလ ၁၈ ရက်နေ့က သတိပေးထုတ်ပြန်ထားသည်။
ယခုလ ဒုတိယပတ်ကစ၍ စစ်ကောင်စီကလွိုင်ကော် -မိုးဗြဲ နှင့် လွိုင်ကော်ဆီဆိုင်လမ်းပိုင်းတွင် နည်းလမ်းပေါင်းစုံဖြင့် စစ်ရေးလှုပ်ရှားမှုများပြုလုပ်လာခြင်းဟု အသိပေးသည်။
