▪︎စစ်ကောင်စီတပ်မှ အနည်းဆုံး ငါးဦးသေဟု ထုတ်ပြန်
ရှမ်းပြည်နယ်မြောက်ပိုင်း လားရှိုးမြို့နယ်တွင် ကိုးကန့်တပ်မတော်(MNDAA)နှင့် စစ်ကောင်စီတပ်တို့ တိုက်ပွဲဖြစ်ပွားခဲ့ရာ စစ်ကောင်စီတပ်မှ သေဆုံးထိခိုက်ရှိခဲ့သည်ဟု MNDAAက ယနေ့ သတင်းထုတ်ပြန်သည်။
ဇူလိုင် ၁၈ရက် နေ့လယ်ပိုင်းက လားရှိုး မဂန်ရွာအနီးတွင် MNDAA တိုင်းရင်းသား တပ်မဟာ (၆၁၁)နှင့် စစ်ကောင်စီတပ်တို့ တိုက်ပွဲဖြစ်ပွားခဲ့ခြင်းဖြစ်သည်ဟု ဆိုသည်။
စစ်ကောင်စီတပ်မှ အင်အား ၄၀ကျော်ပါ စစ်ကြောင်းသည် MNDAA တပ်မဟာ(၆၁၁)၏ တပ်ဖွဲ့တစ်ခုသို့ ချဉ်းကပ်လာရာ ယင်းစစ်ကြောင်းကို တားဆီးရန် တပ်ဖွဲ့ငယ်တစ်ခုကို စေလွှတ် တိုက်ခိုက်ခဲ့ခြင်းဖြစ်ပြီး အပြန်အလှန်ပစ်ခတ်မှု ၁၀မိနစ်ခန့် ကြာမြင့်ခဲ့သည်ဟု ဖော်ပြသည်။
ယင်းတိုက်ပွဲအတွင်း စစ်ကောင်စီတပ်မှ အနည်းဆုံး ငါးဦးသေဆုံးသို့မဟုတ် ဒဏ်ရာရရှိခဲ့ပြီး MNDAA ဘက်က အသေအပျောက်မရှိဟု ထုတ်ပြန်သည်။
MNDAA တိုင်းရင်းသား တပ်မဟာသည် စစ်တပ်အာဏာသိမ်းပြီးပေါ်ပေါက်လာသည့် တပ်မဟာဖြစ်ပြီး ကိုးကန့် လူမျိုးများသာမက တိုင်းရင်းသားလူမျိုးပေါင်းစုံဖြင့် စုဖွဲ့ထားသည့် တပ်မဟာဖြစ်သည်။ ယင်းတပ်မဟာသည် လားရှိုး – သိန္နီဒေသများ၌ စစ်ကောင်စီတပ်နှင့် တိုက်ပွဲဖြစ်ပွားမှုများ ယခင်ကလည်းရှိခဲ့သည်။
