စစ်ကိုင်းတိုင်း၊ မုံရွာမြို့ပေါ်တွင် အိမ်စီးကားဖြင့်ကင်းပတ်နေသော စစ်အုပ်စုအား ပစ်ခတ်တိုက်ခိုက်ရာ ထိခိုက်သေဆုံးမှုရှိကြောင်း မုံရွာခရိုင်တပ်ရင်း(၂၂) နတ်ဆိုးတပ်ရင်း၏ ခေါင်းဆောင် ကိုနတ်ဆိုးက ပြောသည်။
ယမန်နေ့ (ဇူလိုင်၁၄ ရက်) ည ၈ နာရီကျော်က မုံရွာမြို့ စက်မှုဇုန်၊ အေးရိပ်သာလမ်းတွင် ကားမီးပိတ်ပြီး ကင်းပတ်နေသည့် စစ်အုပ်စု၏ Alphard ကားကို အေးရိပ်သာလမ်းနှင့်သီရိမင်္ဂလာ လမ်းဆုံအရောက်တွင် အနီးကပ်ပစ်ခတ်တိုက်ခိုက်ခဲ့ကြောင်း ကိုနတ်ဆိုးက ပြောသည်။
ထိုသို့ ပစ်ခတ်တိုက်ခိုက်မှုကြောင့် စစ်အုပ်စုဝင် နှစ်ဦးသေဆုံးပြီး ထိခိုက်ဒဏ်ရာရရှိသူများလည်းရှိကြောင်း ၎င်းက ပြောသည်။
“စောင့်နေတာ ၂ လမ်းလောက်က စောင့်နေတာ။ ကျွန်တော်တို့ထင်ထားတဲ့အတိုင်း မလာဘဲနဲ့ တခြားလမ်းက ပြန်ဝင်လာတော့ ကားမောင်းတဲ့သူကို ထိထိမိမိမပစ်နိုင်လိုက်ဘူး။ အချက်ရေသုံးလေးဆယ်လောက် ကားထဲပစ်ဝင်သွားတယ်။ အကုန်ကွဲပြဲသွားတယ်။ ပစ္စည်းတွေတော့ မရလိုက်ဘူး။”ဟု နတ်ဆိုးတပ်ရင်း၏ ခေါင်းဆောင် ကိုနတ်ဆိုးက ပြောသည်။
အဆိုပါ ယာဥ်မှာ စက်မှုဇုန်ရှိ အမှတ်(၂)ရဲစခန်းသို့ ဝင်ရောက်သွားပြီးနောက် စခန်းတွင်းမှ ပြန်လည်ပစ်ခတ်မှုများရှိကြောင်း တော်လှန်ရေးရဲဘော်များက ဆိုသည်။
စစ်ကောင်စီဘက်က ထိခိုက်သေဆုံးမှုကိုမူ သီးခြား အတည်ပြုနိုင်ခြင်း မရှိသေးပေ။
အဆိုပါ စစ်ဆင်ရေးကို မုံရွာခရိုင်တပ်ရင်း (၁၃) Aung San Generation ၊ မုံရွာမြို့နယ် (ပ.လ.ဖ) နှင့် မုံရွာခရိုင်တပ်ရင်း(၂၂) နတ်ဆိုးတပ်ရင်းတို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
ပြီးခဲ့သည့် ဇူလိုင် ၁၁ ရက်ကလည်း ဒေသတွင်းတော်လှန်ရေးအင်အားစုများကမုံရွာအနောက်မြောက်တိုင်းစစ်ဌာနချုပ်(နမခ)ကို ရှော့ဒုန်းများဖြင့် ပစ်ခတ်တိုက်ခိုက်ခဲ့ရာ စစ်အုပ်စုထိခိုက်မှုရှိခဲ့သည်။
