စစ်ကိုင်းတိုင်း၊ ပုလဲမြို့နယ်ရှိ ကန်ဒေါင့်ရဲစခန်းအား ဒရုန်းဖြင့် သွားရောက်တိုက်ခိုက်ရာ ရဲ သုံးဦး ဒဏ်ရာရပြီး ဒရုန်း နှစ်စီး ပျက်စီးဆုံးရှုံးခဲ့ကြောင်း မြိုင်(ပကဖ)အဖွဲ့ဝင် ဗိုလ်Crossက ပြောသည်။
ယမန်နေ့(ဇူလိုင် ၂၂ ရက်) မွန်းလွဲ ၁နာရီခွဲခန့်က ပုလဲမြို့နယ်ရှိ ကန်ဒေါင့်ရဲစခန်းအား ဒရုန်းဖြင့် ဗုံးသီး(၉)လုံးချ တိုက်ခိုက်ခဲ့ရာ စခန်းအတွင်းရှိ ရဲ သုံးဦး ထိခိုက်ဒဏ်ရာရရှိခဲ့ကြောင်း မြိုင်(ပကဖ)အဖွဲ့က ဗိုလ်Cross က ပြောသည်။
“ကန်ဒေါင့်ရဲစခန်းမှာ ၄၀လောက်ရှိတယ်။ ဘန်ကာနေရာကို လေးလုံး၊ နားနေဆောင်ဘက်ကို ၅ငါးလုံး ချနိုင်ခဲ့တယ်။”ဟု ဗိုလ် Cross က ပြောသည်။
သို့သော် စစ်ကောင်စီတပ်ဆင်ထားသော ဂျန်ပါကြောင့် ပြည်သူ့တပ်ဖွဲ့၏ ဒရုန်း နှစ်စီးလည်း ပျက်စီးဆုံးရူံးခဲ့ရကြောင်း မြိုင်(ပကဖ)အဖွဲ့က ပြောသည်။
အဆိုပါ စစ်ဆင်ရေးကို မြိုင်ပြည်သူ့ကာကွယ်ရေး ဒရုန်းတပ်ဖွဲ့၊ မြိုင်ပြည်သူ့ကာကွယ်ရေး (ပ.က.ဖ)တပ်ရင်း – ၂၊တပ်ခွဲ – ၂၊ပုလဲနယ်မြေခံတပ်ဖွဲ့နှင့် Earthquake People’s Defence Force တို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
ကန်ဒေါင့်ရဲစခန်းရှိ စစ်ကောင်စီအဖွဲ့ဝင်များအား ဇူလိုင်လ ၁၉ ရက်ကလည်း ပုလဲနယ်အတွင်းရှိ ဒေသတွင်း ပြည်သူ့ကာကွယ်ရေးအဖွဲ့များက ဒရုန်းဖြင့် ဗုံးချတိုက်ခိုက်ခဲ့သေးသည်။
