မိုးဗြဲ – လွိုင်ကော်လမ်းပိုင်းတွင် စစ်ကောင်စီ၏ တပ်မ(၅၅)အား ကြားဖြတ်တိုက်ခိုက်ခဲ့ကြောင်း ဖယ်ခုံ PDF တပ်ရင်း(၁၀၀၆)က ထုတ်ပြန်သည်။
ရှမ်း – ကရင်နီပြည်နယ်စပ် မိုးဗြဲ-လွိုင်ကော် လမ်းမကြီး အတိုင်းဆင်းလာသော တပ်မ(၅၅)ကို ဖယ်ခုံPDF တပ်ရင်း(၁၀၀၆၊ နှင့် ကရင်နီအမျိုးသားများကာကွယ်ရေးတပ်(KNDF)တပ်ရင်း – ၃တို့ ဇူလိုင် ၂၁ရက်က တိုက်ခိုက်ခဲ့ပြီး စစ်ကောင်စီတပ် ထိခိုက်မှုရှိကြောင်း အသိပေးသည်။
ထို့နောက် ယမန်နေ့အထိ တိုက်ပွဲမှာ ဆက်လက်ဖြစ်ပွားခဲ့ပြီး စစ်ကောင်စီက ကန်းကျိုင်းနှင့် ဆောင်ကန်း (ရှမ်း)ရွာတို့တွင် လက်ရှိတပ်စွဲထားပြီး နှစ်ဖက်စစ်ရေးတင်းမာနေဆဲဟု ဆိုသည်။
“ကလော အခြေစိုက်တပ်မ (၅၅)အောက်ခံရင်းတစ်ခု ဝင်လာတာ။အဓိကတော့ လွိုင်ကော်ဘက်ကို ဆင်းဖို့လာရင်းနဲ့ တိုက်ပွဲဖြစ်တယ်။အခု လွိုင်ကော် -မိုးဗြဲ ကြားထဲက ရွာထဲမှာ စကစ ဘက်က နေရာယူထားတယ်”ဟု ကရင်နီဒေသခံစစ်ရေးသတင်းရင်းမြစ်က ရှင်းပြသည်။
လက်ရှိစစ်ကောင်စီတပ် တပ်စွဲထားသည့် ကျေးရွာများရှိ ဒေသခံပြည်သူများမှာ ထွက်ပြေးနေရသည်။
ထို့အပြင် ယမန်နေ့က ရေသန့်တင်ကားဟု ယူဆရသော Light Truckကားတစ်စီးကို စစ်ကောင်စီတပ်က အကြောင်းမဲ့ပစ်ခတ်ပြီး ဆောင်ကန်းရွာတွင် ထိန်းသိမ်းထားကာ ကားပေါ်လိုက်ပါသူလာသူများ၏ အသေးစိတ်အခြေနေကိုမသိရသေးပေ။
စစ်ရေးဆက်လက်ပြင်းထန်နိုင်သည့်အတွက် လွိုင်ကော်-မိုးဗြဲလမ်းမကြီးကို သတိနှင့်သွားလာရန် ဖယ်ခုံ PDF က တိုက်တွန်းသည်။
ထို့အတူ လွိုင်ကော်မြို့အထွက် ပဒါးညေးကျေးရွာနှင့် အနီးတဝိုက်၌ ယခုလ ၂၀ ရက်ကစ၍ စစ်ကောင်စီတပ်နှင့် ကရင်နီပူးပေါင်းတပ်များ ထိတွေ့မှုများရှိနေဆဲဖြစ်ကာ ဒေသခံအချို့ကို စစ်ကောင်စီက လူသားဒိုင်းအဖြစ် ပြုလုပ်ထားသည်။
ထို့ကြောင့် လွိုင်ကော်-မိုးဗြဲ နှင့် လွိုင်ကော် – ဆီဆိုင် လမ်းမကြီး၌ အချိန်မရွေးတိုက်ပွဲ ဖြစ်နိုင်ကြောင်း ကရင်နီအမျိုးသားများကာကွယ်ရေးတပ်(KNDF)တပ်ရင်း -၂ က ထုတ်ပြန်ထားသည်။
ယခုလ ဒုတိယပတ်ကစ၍ စစ်ကောင်စီက လွိုင်ကော် -မိုးဗြဲ နှင့် လွိုင်ကော်ဆီဆိုင်လမ်းပိုင်းတွင် နည်းလမ်းပေါင်းစုံဖြင့် စစ်ရေးလှုပ်ရှားမှုများပြုလုပ်လာခြင်း ဖြစ်သည်။
