စစ်ကိုင်းတိုင်း၊ ရွှေဘိုမြို့နယ်တွင် PDF ယူနီဖောင်းဝတ်ဆင်ထားသည့် စစ်ကောင်စီတပ်သားများက ချီပါကျေးရွာရှိ စာသင်ကျောင်းမီးရှို့ဖျက်ဆီးပြီး ၎င်းတို့ပစ်ခတ်၍ ပြည်သူတစ်ဦး ကျည်ထိမှန်ထားကြောင်း ဒေသတွင်းသတင်းရင်းမြစ်များက ပြောသည်။
ယနေ့(ဩဂုတ် ၂၀ရက်)နံနက် ၄ နာရီခန့်က စစ်ကောင်စီတပ်သည် ရွှေဘိုမြို့နယ်ရှိ ချီပါတောင်ရွာနှင့် မြောက်ရွာသို့ စစ်ကြောင်းထိုး ဝင်ရောက်ခဲ့သည်။
၎င်းတို့ပစ်ခတ်မှုကြောင့် ချီပါမြောက်ရွာရှိ ပြည်သူတစ်ဦး ကျည်ထိမှန်ပြီး အရေးပေါ်ဆေးကုသမှုခံယူနေရကြောင်း ရွှေဘိုမြို့နယ်သတင်းအမှန်ပြန်ကြားရေးအဖွဲ့က ပြောသည်။
နံနက် ၇နာရီခွဲခန့်တွင် စစ်ကောင်စီတပ်က ချီပါတောင်ရွာစာသင်ကျောင်း ပစ်ခတ်ဝင်ရောက်ကာ ဒေသခံအများအပြား ဖမ်းဆီး၍ ဖုန်းများသိမ်းဆည်းခဲ့ကြောင်း၊ ထို့အပြင် စာသင်ကျောင်းမီးရှို့ဖျက်ဆီးခဲ့ကြောင်း ဒေသခံများက ပြောသည်။
“လက်နက်ကြီးတွေနဲ့ ပစ်ခတ်ပြီး အင်အား ၁၅၀ခန့်နဲ့ စစ်ကြောင်းထိုးလာတာ။ ရွှေဘိုအနောက်ဘက်ခြမ်း ချီပါရွာ၊ ကျည်ပွေ့ကုန်းရွာခံတွေ ရှောင်နေရတယ်။”ဟု ဒေသခံတစ်ဦးက ပြောသည်။
ထို့အပြင် နေ့လယ် ၁၂နာရီခန့်တွင် စစ်ကောင်စီတပ်က PDF ယူနီဖောင်းများ ဝတ်ဆင်၍ ချီပါတောင်ရွာနှင့် မြောက်ရွာသို့ ဝင်ရောက်ခဲ့ခြင်းဖြစ်ကြောင်း ဒေသခံများက ပြောသည်။
အဆိုပါ စစ်ကောင်စီတပ်စစ်ကြောင်းကြောင့် ချီပါတောင်၊မြောက်ကျေးရွာ၊မဲတောကျေးရွာနှင့် ကျည်ပွေ့ကုန်းကျေးရွာတို့မှ ဒေသခံပြည်သူ ၈,၀၀၀ကျော် ထွက်ပြေးတိမ်းရှောင်နေရကြောင်း သတင်းရရှိသည်။
အလားတူ ဒီပဲယင်းမြို့နယ်တွင်လည်း စစ်ကောင်စီတပ်က စစ်ကြောင်းထိုး ဝင်ရောက်နေ၍ ကျေးရွာအချို့ ထွက်ပြေးတိမ်းရှောင်နေရကြောင်း ဒီပဲယင်းမြို့နယ်ညီနောင်များအဖွဲ့က ပြောသည်။
ကုလသမဂ္ဂ လူသားချင်းစာနာမှုဆိုင်ရာပေါင်းစပ်ညှိနှိုင်းရေးမှူးရုံး(UNOCHA)၏ ဧပြီ ၁၉ရက် ထုတ်ပြန်ချက်အရ မြန်မာနိုင်ငံတွင် လက်နက်ကိုင်ပဋိပက္ခကြောင့် အိုးအိမ်စွန့်ခွာ ထွက်ပြေးနေရသူ တစ်သန်းရှစ်သိန်းကျော် ရှိပြီဟု သိရသည်။
