စစ်ကိုင်းတိုင်း ကနီမြို့နယ် နွားခြံကုန်းကျေးရွာတွင် ယနေ့(ဩဂုတ် ၂၀ရက်)နံနက်က ဖြစ်ပွားသော တိုက်ပွဲအတွင်း စစ်ကောင်စီတပ် ထိခိုက်မှုရှိပြီး တပ်ကြပ်တစ်ဦးအား ပြည်သူ့ကာကွယ်ရေးတပ်ဖွဲ့များက အရှင်ဖမ်းမိခဲ့သည်။
နွားခြံကုန်းကျေးရွာတွင် ဩဂုတ် ၁၈ရက်မှစ၍ သုံးရက်ဆက် တိုက်ပွဲဖြစ်နေခြင်းဖြစ်သည်။ ယနေ့ နံနက်က တိုက်ပွဲတွင် စစ်ကောင်စီ၏ တပ်ကြပ်တစ်ဦးကို အရှင်ဖမ်းမိထားသည်ဟု ပြည်သူ့ကာကွယ်ရေးရဲဘော်တစ်ဦးက People’s Spring သို့ပြောသည်။
“နွားခြံကုန်းနဲ့ ကျောက်မှော်ရွာနားမှာ နှစ်ယောက် မိတာဗျ။ တစ်ယောက်က ပြန်ခုခံပြေးလို့ ပစ်လိုက်ရတာ။ ဖမ်းမိထားသူဆီမှာ စာရွက်စာတမ်းတချို့လည်းပါတယ်”ဟု အဆိုပါ ပြည်သူ့ကာကွယ်ရေးရဲဘော်က ပြောသည်
နွားခြံကုန်းကျေးရွာတွင် ဩဂုတ် ၁၈ရက်ကလည်း ၄နာရီခန့်ကြာတိုက်ပွဲဖြစ်ခဲ့ပြီး စစ်ကောင်စီဘက်က သေဆုံးမှုများပြားကာ ပြည်သူ့ကာကွယ်ရေးရဲဘော်တစ်ဦး အသေးစားဒဏ်ရာရခဲ့သည်။
မြေပြင်အထိနာသည့် စစ်ကောင်စီစစ်ကြောင်းသည် နွားခြံကုန်းကျေးရွာကို မီးရှို့ဖျက်ဆီးခဲ့ပြီး ရွာ၌ပင် တပ်စွဲထားသည်။ ထို့နောက် မုံရွာအနောက်မြောက်ပိုင်းတိုင်းစစ်ဌာနချုပ်(နမခ)မှနေ၍ လက်နက်ကြီးများ ပစ်ကူပေးခဲ့သည်။
ယနေ့တိုက်ပွဲတွင်လည်း ထပ်မံအထိနာသွားသောကြောင့် မုံရွာ(နမခ)မှ လက်နက်ကြီးများ ပစ်ကူပေးနေပြီး လတ်တလောစစ်ရေးအခြေအနေကြောင့် ကနီနှင့် ယင်းမာပင်မြို့နယ်စပ်တလျှောက်ရှိ ကျောက်ကုန်း၊အင်းပက်၊ နွားခြံကုန်း၊ ကျောက်မှော်နှင့် ကြက်လျှာကျေးရွာတို့မှ ဒေသခံများ ဘေးလွတ်ရာသို့ထွက်ပြေးတိမ်းရှောင်နေရကြောင်းသတင်းရရှိသည်။
