ပြည်သူများအနေဖြင့် မည်သည့်အဖွဲ့က အကြမ်းဖက်အဖွဲ့အစည်းဖြစ်သည်ဆိုသည်ကို ပိုမိုသိရှိကြောင်း ကချင်လွတ်လပ်ရေးတပ်မတော်(KIA) သတင်းနှင့် ပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောကြားသည်။
စစ်ကောင်စီက ယမန်နေ့တွင် ပြုလုပ်ခဲ့သည့် သတင်းစာရှင်းလင်းပွဲ၌ စစ်ကောင်စီ ပြောရေးဆိုခွင့်ရှိသူ ဇော်မင်းထွန်းက “ အကြမ်းဖက်သမားတွေနဲ့ တွေ့ဆုံဆွေးနွေးရေး လမ်းကြောင်း လျှောက်လှမ်းဖို့ မရှိပါဘူး”ဟု ပြောကြားခဲ့သည်။
စစ်ကောင်စီက ပြည်သူလူထုကိုပစ်မှတ်ထား တိုက်ခိုက်သည့် အကြမ်းဖက်လုပ်ရပ်များစွာ ကျူးလွန်ခဲ့သော်လည်း အမျိုးသားညီညွတ်ရေးအစိုးရ၊ ပြည်သူ့ကာကွယ်ရေးတပ်မတော်နှင့် တိုင်းရင်းသားအဖွဲ့အစည်းများကို အကြမ်းဖက်အဖွဲ့ဟု စွပ်စွဲပြောဆိုနေခြင်းဖြစ်သည်။
ယင်းနှင့်ပတ်သက်ပြီး KIA သတင်းပြန်ကြားရေးဌာနတာဝန်ခံ ဗိုလ်မှူးကြီးနော်ဘူက “မနေ့က နေပြည်တော် သတင်းစာရှင်းလင်းပွဲမှာ အကြမ်းဖျက်အဖွဲ့ နဲ့ နိုင်ငံရေး မဆွေးနွေးဘူးလို့ပြောသွားတယ်၊ မှန်ပါတယ် မဆွေးနွေးတာကောင်းပါတယ်။ဘယ်အဖွဲ့က အကြမ်းဖျက်အဖွဲ့ ဆိုတာပြည်သူလူထုပဲပိုသိမှာပါ”ဟု ၎င်း၏ Facebook တွင် ယနေ့ ရေးသားဖော်ပြသည်။
စစ်ကောင်စီအနေဖြင့် ပြည်သူလူထုကို လေကြောင်း၊ လက်နက်ကြီးများဖြင့် ပစ်မှတ်ထား တိုက်ခိုက်ခြင်း၊ ဒေသအသီးသီး၌ ပြည်သူလူထုများကို ဖမ်းဆီးနှိပ်စက်သတ်ဖြတ်ခြင်း၊ အရှင်လတ်လတ်မီးရှို့ခြင်း၊ ပြည်သူလူထုနေအိမ်များကို မီးရှို့ဖျက်ဆီးခြင်း၊ ပြည်သူပိုင်ပစ္စည်းများကို လုယက်ယူဆောင်ခြင်းစသည်တို့ကို ပုံစံမျိုးစုံဖြင့် ကျူးလွန်လျက်ရှိသည်။
