ကရင်ပြည်နယ် ကော့ကရိတ်မြို့အနီးမှာ ဒီနေ့မနက်အစောပိုင်းကစတင်ပြီး စစ်ကောင်စီတပ်နဲ့ KNU ပူးပေါင်းတပ်တွေကြားတိုက်ပွဲဖြစ်ပွားရာမှာ စစ်ကောင်စီက လေကြောင်းပစ်ကူပါသုံးပြီးတိုက်ခိုက်နေတယ်လို့ ပူးပေါင်းတပ်ထံက သိရပါတယ်။
ကော့ကရိတ်မြို့နယ်အနီး နန်းကော်တိုးရွာနဲ့ တတန်ကူးရွာ ကြားမှာရှိတဲ့ ဆင်ကုန်းရွာဘက်ကို စစ်ကြောင်းဝင်လာတဲ့ စစ်ကောင်စီတပ်နဲ့ KNU ၊ PDF ပူးပေါင်းတပ်တွေဒီနေ့မနက်ပိုင်းက တိုက်ပွဲဖြစ်တာပါ။
မြေပြင်တိုက်ပွဲမှာ ခြေလျင်တပ်တွေ အထိနာလာချိန် လက်နက်ကြီးသုံးလာသလို လေကြောင်းကနေ ပါ တိုက်ခိုက်တာလို့ ပူးပေါင်းတပ်ဘက်က ဆိုပါတယ်။
စစ်ကောင်စီရဲ့အာဘော်ဖြန့်ဝေတဲ့ တယ်လီဂရမ်အချို့မှာတော့ ကော့ကရိတ်မြို့အနီးက ဆင်ကုန်းစခန်းကို မနက် ၅ နာရီခွဲမှာ ဝင်ရောက်ရှင်းလင်းပြီး KNU နဲ့ PDF ပူးပေါင်းတပ်တွေရှိရာနေရာဆီ လေကြောင်းက တိုက်ခိုက်ခဲ့တယ်လို့ ဖော်ပြကြပါတယ်။
ပူးပေါင်းတပ်ဖွဲ့ဘက်ကတော့ ဆင်ကုန်းရွာမှာ စခန်းချထားတာမရှိဘူးလို့ပြောပါတယ်။
Public Service Announcement
“ဆင်ကုန်းဆိုတာ စခန်းမဟုတ်ဘူး ရွာဗျ၊ အဲ့ဒီရွာမှာကျတော့ ဘယ်လိုပြောရမလဲ ကျနော်တို့ဘက်က လူတွေကမရှိဘူးလေ” လို့ ပူးပေါင်းတပ်ဖွဲ့ဝင်တစ်ဦးက ဆိုပါတယ်။
လက်ရှိမှာတော့ ပစ်ခတ်တိုက်ခိုက်မှုတွေကြောင့် ဆင်ကုန်းရွာနဲ့ အနီးတဝိုက်က ပြည်သူတွေ ထွက်ပြေးနေကြရတယ်လို့သိရပါတယ်။
ဓာတ်ပုံ − EPA
