စစ်ကိုင်းတိုင်း၊ မုံရွာမြို့၊ ပညာရေးတက္ကသိုလ် လေ့ကျင့်ရေးကျောင်း(TTC)အနီးတွင် စစ်ကောင်စိတပ် ရမ်းသမ်းပစ်ခတ်မှုကြောင့် သေဆုံးခဲ့သည့် ဇနီးမောင်နှံနှစ်ဦး၏ နာရေးအား ယနေ့ ညနေက ပြုလုပ်ခဲ့သည်။
ယမန်နေ့ (အောက်တိုဘာ ၂၃ ရက်) နံနက် ၉နာရီခန့်က TTC ကျောင်းရှိ စစ်ကောင်စီတပ်အား ဒေသတွင်း PDF ရဲဘော်များက လာရောက်ပစ်ခတ်ရာ နှစ်ဖက်အပြန်အလှန် ပစ်ခတ်ခဲ့ကြသည်။
ထိုအချိန်တွင် စစ်ကောင်စီတပ်က ရမ်းသမ်းပစ်ခတ်ခဲ့၍ လမ်းမပေါ်ဖြတ်သန်းသွားလာနေသည့် အမျိုးသားနှစ်ဦးနှင့် အမျိုးသမီးတစ်ဦးတို့ ထိမှန်သေဆုံးခဲ့ကြောင်း ဒေသခံများက ပြောသည်။
သေဆုံးသူ သုံးဦးအနက် နှစ်ဦးမှာ မုံရွာမြို့ အောင်ချမ်းသာရပ်၊နယ်မြေ(၄)မှ (၂၃)နှစ်အရွယ် ကိုနေမျိုးအာကာနှင့် ဇနီးဖြစ်သူ (၂၂)နှစ်အရွယ် မသီသီအောင်တို့ဇနီးမောင်နှံတို့ဖြစ်သည်။
၎င်းတို့တွင် (၁)နှစ်အရွယ် ကလေးငယ်တစ်ဦး ကျန်ရစ်ခဲ့ကြောင်း မုံရွာမြို့ခံအချို့က ပြောသည်။
Public Service Announcement
“TTCမှာ အဖွဲ့တစ်ဖွဲ့က ပွဲဖော်ဆောင်ရာကနေ ဒီကောင်တွေ ရမ်းသမ်းပစ်ခတ်ရာကနေ ပြည်သူ သုံးဦးကို ထိမှန်သွားတာ။”ဟု မုံရွာအခြေစိုက် PDFရဲဘော်တစ်ဦးက ပြောသည်။
အဆိုပါ ဇနီးမောင်နှံ၏ နာရေးအား ယနေ့ ညနေ ၃နာရီတွင် မြို့မသုဿန်သို့ ပို့ဆောင်သင်္ဂြိုလ်ခဲ့သည်။
ယမန်နေ့က မုံရွာမြို့နယ် သာစည်ကျေးရွာအနီး စစ်ကောင်စီတပ်သား သုံးဦးအား PDF ရဲဘော်များက ပစ်ခတ်ခံရာ တစ်ဦးသေဆုံးပြီး လက်နက်နှင့်ခဲယမ်းများ သိမ်းဆည်းခံခဲ့ရသည်။
