MNDAAနှင့် တိုက်ပွဲဆက်ဖြစ်ပြီး စစ်ကောင်စီတပ် သေဆုံးထိခိုက်မှုရှိ

စစ်ကောင်စီတပ်ထံမှ လက်နက်ခဲယမ်းနှင့် မူးယစ်ဆေးများ ထပ်မံသိမ်းဆည်းရရှိဟု အသိပေး

ကိုးကန့်တပ်မတော်(MNDAA)နှင့် စစ်ကောင်စီတပ်အကြား တိုက်ပွဲဆက်လက်ဖြစ်ပွားခဲ့ပြီး စစ်ကောင်စီတပ်ဖွဲ့ဝင်များ သေဆုံးထိခိုက်ရှိခဲ့သည်ဟု MNDAAက သတင်းထုတ်ပြန်သည်။

အောက်တိုဘာ ၁၄ရက်က ကိုးကန့်ဒေသတိုက်ပွဲအတွင်း စစ်ကောင်စီတပ်မှ ၁၆ဦးသေဆုံးပြီး လက်နက် ၁၁လက်နှင့် ခဲယမ်းများကို MNDAAက သိမ်းဆည်းရရှိခဲ့ပြီးနောက် တိုက်ပွဲထပ်မံဖြစ်ပွားလာခြင်းဖြစ်သည်ဟုဆိုသည်။ တိုက်ပွဲသတင်းထုတ်ပြန်ရာ၌ စစ်ကောင်စီတပ်ဟု သုံးနှုန်းခြင်းမရှိဘဲ မင်းအောင်လှိုင်လက်နက်ကိုင်တပ်ဖွဲ့ဟု ဖော်ပြထားသည်ကို တွေ့ရသည်။

အောက်တိုဘာ ၂၁ ရက်က စစ်ကောင်စီတပ်ဖွဲ့(မင်းအောင်လှိုင်လက်နက်ကိုင်တပ်ဖွဲ့)နှင့် ကိုးကန့်ပြည်သူ့စစ်အဖွဲ့ပူးပေါင်းပြီး MNDAA တပ်ရှိရာ စစ်ရေးလှုပ်ရှားလာ၍ ကိုးကန့်ခရိုင် ရှင်ဝမ်ဒေသတွင် တိုက်ပွဲဖြစ်ပွားခဲ့သည်ဟု ထုတ်ပြန်သည်။ စာသင်ကျောင်း၌ တပ်စွဲထားသည့် စစ်ကောင်စီနှင့် ကိုးကန့် ပြည်သူ့စစ် ပူးပေါင်းအဖွဲ့အား တိုက်ခိုက်ခဲ့ရာ စစ်ကောင်စီတပ်မှ အနည်းဆုံး ၈ဦး သေဆုံးပြီး ဒရုန်း ၂စီး၊ ကား ၄စီး ပျက်စီးခဲ့ကြောင်း ကျည်ကာနှင့် ကျည်ဘောက် ၃ခု ၊ ကျည်များ သိမ်းဆည်းရရှိခဲ့ကြောင်း အသိပေးသည်။

‌အောက်တိုဘာ ၁၄ ရက်တိုက်ပွဲတွင် အထိနာသွားသော စစ်ကောင်စီတပ်ဖွဲ့သည် နမ်ခုံဟော်ရွာနှင့် ရှိပတ်လင်နေရာတွင် လူအင်အား ၁၀၀ကျော်စုစည်းခဲ့ကြောင်း၊ ယင်းအနက် ကိုးကန့်ပြည်သူ့စစ်တပ်ဖွဲ့ဝင် ၂၀ဦး ပါဝင်ကြောင်း၊ ယင်းစစ်ကောင်စီတပ်နှင့် တိုက်ပွဲဖြစ်ပွားခဲ့ရာ စစ်ကောင်စီတပ်မှ သေဆုံးထိခိုက်ရှိခဲ့ပြီး MNDAA ရဲဘော် တစ်ဦး ဒဏ်ရာရရှိခဲ့သည်ဟု အသိပေးသည်။

တိုက်ပွဲဖြစ်ပွားရာနေရာသို့ ယမန်နေ့ အောက်တိုဘာ ၂၄ရက်၌ ရှင်းလင်းရေးလုပ်ဆောင်ရာ စစ်ကောင်စီတပ်ထံမှ လက်နက်ခဲယမ်း အချို့သိမ်းဆည်းရရှိခဲ့ကြောင်း၊ ယင်းအထဲတွင်မူးယစ်ဆေးဝါးစိတ်ကြွပြား (၄)ထုပ်ပါဝင်ကြောင်း MNDAAက ထုတ်ပြန်သည်။

Public Service Announcement

ယခင် အောက်တိုဘာ ၁၇ရက်က ဖမ်းဆီးရရှိသော စစ်ကောင်စီတပ်ဖွဲ့မှ စစ်သုံ့ပန်းထံမှလည်း မူးယစ်ဆေးဝါးစိတ်ကြွပြား (၃၁)ထုပ် သိမ်းဆည်းရရှိခဲ့သည်ဟု ဆိုသည်။

ထိုပြင် စစ်ကောင်စီ ပူးပေါင်းတပ်ဖွဲ့မှ တိုက်ပွဲ၌သေဆုံးသူများကို အလျဉ်စလို မြှုပ်နှံခဲ့ရာ ကိုယ်လက်အင်္ဂါ အချို့ မိုးရေကြောင့် မြေကြီးပေါ် ထွက်နေသည်ကို တွေ့ရကြောင်းလည်း ဓာတ်ပုံမှတ်တမ်းနှင့်အတူ ဖော်ပြသည်။

စစ်ကောင်စီတပ်နှင့်အတူ ကိုးကန့် ပြည်သူ့စစ်များပါဝင်လာခြင်းနှင့်ပတ်သက်ပြီး MNDAA အရာရှိက စစ်မြေပြင်တွင် ကိုးကန့်လူမျိုးများ စစ်ကောင်စီတပ်ဖွဲ့နှင့် ပူးပေါင်းနေသည်ကို မတွေ့လိုကြောင်း ပြောကြားခဲ့သည်ဟု ထုတ်ပြန်သည်။

MNDAA အနေဖြင့် ကိုးကန့်လူမျိုးအချင်းချင်း မပစ်ခတ်ဆိုသည့် ရပ်တည်ချက်ရှိသော်လည်း တပ်ဖွဲ့ဝင်များအား စတင် တိုက်ခိုက်လာပါက ပြန်လည်တုံ့ပြန်မည်ဟုလည်း အသိပေးခဲ့သည်။