တရုတ်နိုင်ငံမှာ အသားပေါ်ပြီး ဝက်သား၊ ဆိတ်သားအဖြစ် ညာရောင်းဖို့ ရည်ရွယ်ထားတဲ့ ကြောင်အကောင်ရေ ၁၀၀၀ လောက်ကို အာဏာပိုင်တွေက ကယ်ဆယ်ခဲ့ရပါတယ်။
အဲဒီ ကြောင်တွေကို ထရပ်ကားပေါ်တင်ပြီး သားသတ်ရုံ တစ်ခုဆီ ပို့ဆောင်တော့မယ့် အချိန်မှာ သတင်းပေး တိုင်ကြားမှု ရရှိလို့ သွားရောက် တားဆီးခဲ့ရတာလို့ ကျီယန်ဆုပြည်နယ် ရဲတပ်ဖွဲ့က ပြောပါတယ်။ အဲဒီဖြစ်စဉ်ဟာ ပြီးခဲ့တဲ့လက ပေါ်ပေါက်ခဲ့ပေမယ့် ရဲတပ်ဖွဲ့က အခုမှသာ ထုတ်ပြန်ခဲ့တာပါ။
နိုင်ငံအရှေ့ပိုင်း၊ ကျီယန်ဆုမှာရှိတဲ့ ရှန်ကျီကန် မြို့ထဲမှာ ထရပ်ကား တစ်စီးကို တာဝန်ရှိသူတွေက ကြားဖြတ် တားဆီးခဲ့တာလို့ ဆိုပါတယ်။ အဲဒီလို ဟန့်တားမှုသာ မရှိခဲ့ရက် ဖမ်းဆီးခံထားရတဲ့ ကြောင်တွေဟာ သားသတ်ရုံကို ရောက်သွားမယ်လို့ သိရပါတယ်။
အခုတော့ ကြောင်တွေကို အနီးမှာရှိတဲ့ လေလွင့် အိမ်မွေးတိရစ္ဆာန် စောင့်ရှောက်ရေး ဂေဟာတစ်ခုဆီ ပို့ဆောင်ထားပြီ ဖြစ်ပါတယ်။ အဲဒီကြောင်တွေကို အသားပေါ်ပြီး ဝက်သား၊ ဆိတ်သားအဖြစ် ညာရောင်းရင် ဒေါ်လာ ၂၀၅၀၀ လောက်ထိ ရရှိနိုင်မယ်လို့လည်း ခန့်မှန်းရပါတယ်။
တိရစ္ဆာန် အခွင့်အရေး တက်ကြွလှုပ်ရှားသူတွေက သံရိုက်ထားတဲ့ သစ်သားပုံးတွေထဲမှာ ကြောင်တွေကို အရေအတွက် အများကြီး ထည့်သယ်သွားတာကို သတိပြုမိတဲ့နောက် ရဲတွေဆီ အသိပေး တိုင်ကြားခဲ့တာ ဖြစ်ပါတယ်။
Public Service Announcement
တရုတ်ဟာ စားနပ်ရိက္ခာ ဖူလုံမှုနဲ့ အရည်အသွေးဆိုင်ရာ ပြဿနာတွေအတွက် ကာလရှည်ကြာ ရုန်းကန်နေခဲ့ရတဲ့ ရာဇဝင်မျိုး ရှိပါတယ်။ တစ်ခါတုန်းကလည်း ကောလိပ်မှာ ကျွေးမွေးတဲ့ အစားအသောက်ထဲမှာ ကြွက်ခေါင်းကြီး ပါလာလို့ အကြီးအကျယ် အရှက်ရစရာတွေ ဖြစ်ခဲ့ဖူးကြောင်း သိရပါတယ်။
