မန္တလေးတိုင်း၊ ငါန်းဇွန်မြို့နယ်တွင် စစ်ကောင်စီတပ်အား တစ်ရက်တည်း သုံးကြိမ်တိုင် မိုင်းဆွဲတိုက်ခိုက်ခဲ့သည့်ဖြစ်စဥ်အတွင်း ထိခိုက်သေဆုံးမှုများရှိကြောင်း ငါန်းဇွန်မြို့နယ်ပြည်သူ့ကာကွယ်ရေးအဖွဲ့က ထုတ်ပြန်သည်။
အောက်တိုဘာ ၂၅ ရက် နံနက် ၉ နာရီခန့်က ငါန်းဇွန်မြို့နယ်၊ နတ်ကြီးကျေးရွာမှ ရေဆင်းကျေးရွာဘက်သို့ ထွက်လာသည့် စစ်ကောင်စီစစ်ကြောင်းကို မိုင်းဆွဲတိုက်ခိုက်ခဲ့ရာ နှစ်ဦးသေဆုံးပြီး ငါးဦး ပြင်းထန်ဒဏ်ရာရရှိကြောင်း ယမန်နေ့(အောက်တိုဘာ ၃၁ရက်) သတင်း ထုတ်ပြန်သည်။
ထို့နောက် နံနက် ၉ နာရီခွဲခန့်တွင်လည်း ခေါင်းဘိုကျေးရွာမှ ထွက်လာသည့် စစ်ကြောင်းကိုပါ ထပ်မံတိုက်ခိုက်ခဲ့ကြောင်း ငါန်းဇွန်(ပကဖ)ကဆိုသည်။
ထိုဖြစ်စဥ်၌ စစ်သား ၆ ဦးသေဆုံးပြီး ၁ ဦးလက်မောင်းဒဏ်ရာရရှိခဲ့ကြောင်း ငါန်းဇွန်ပကဖအဖွဲ့၏ တာဝန်ရှိသူက ပြောသည်။
ထို့နောက် လက်ပံသာကျေးရွာသို့ထွက်လာသည့် စစ်ကြောင်းကိုပါ ထပ်မံမိုင်းဆွဲတိုက်ခိုက်ခဲ့ကြောင်း ၎င်းက ဆိုသည်။
Public Service Announcement
“စစ်ကြောင်းက နှစ်ကြောင်းပါ။အင်အားက ၅၀စီလောက်ပဲ။အခုတော့ သားကျင်နဲ့နတ်ကြီးဘက်မှာ ပြန်အထိုင်ချထားတယ်။”ဟု ငါန်းဇွန်(ပကဖ)၏ တာဝန်ရှိသူက ပြောသည်။
ထိုစစ်ဆင်ရေးများကို ငါန်းဇွန်မြို့နယ်ပြည်သူ့ကာကွယ်ရေးအဖွဲ့( ငါန်းဇွန် ပ.က.ဖ )၊ T.G.R people defence force မြောင်မြို့နယ် T.G.Rပြည်သူ့ကာကွယ်ရေးတပ်ဖွဲ့၊ Black Eagle Defence Force – MMU၊ ကျောက်ဆည်ခရိုင်တပ်ရင်း ၂၊ မြင်းခြံခရိုင်တပ်ရင်း ၇ တပ်ခွဲ ၁ ငါန်းဇွန် မီးနဂါး ပျောက်ကျားအဖွဲ့၊ ငါန်းဇွန်ပကဖ အဖွဲ့ဝင်များဖြစ်သော 925 ပျောက်ကျားအဖွဲ့၊
TGYR ပျောက်ကျားအဖွဲ့၊ ဒေါင်းဖိုက်တာပျောက်ကျားအဖွဲ့၊ ပြည်တော်ဝင်ပျောက်ကျားအဖွဲ့၊ လက်ရုံးပျောက်ကျားအဖွဲ့၊ ဖက်ဒရယ်ညီအကိုပျောက်ကျားအဖွဲ့၊ ရွှေဂျိုးဖြူ ပျောက်ကျားအဖွဲ့၊ ငန်းနက်ပျောက်ကျားအဖွဲ့၊ အားမာန်သစ်ပျောက်ကျားအဖွဲ့တို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
အောက်တိုဘာ ၂၃ ရက်ကလည်း ငါးဇွန်မြို့နယ်တစ်နေရာတွင် တိုက်ပွဲဖြစ်ပွားပြီး စစ်ကောင်စိတပ်က ဒေသခံပြည်သူနှစ်ဦးဖမ်းဆီး သတ်ဖြတ်သွားကြောင်း မြင်းခြံခရိုင် အမှတ်(၆)တပ်ရင်းက ထုတ်ပြန်ထားသည်။
