‘၁၀၂၇ စစ်ဆင်ရေး’ ၆ရက်မြောက်နေ့ဖြစ်သည့် ယနေ့(နိုဝင်ဘာ ၁ရက်) နံနက်တွင် ရှမ်းပြည်နယ်မြောက်ပိုင်း ကွမ်းလုံမြို့နယ်၌ တိုက်ပွဲဖြစ်ပွားနေကြောင်း ကိုးကန့်တပ်မတော် (MNDAA) ပြောရေးဆိုခွင့်ရှိသူ လီကျာဝင်းက ပြောသည်။
ကိုးကန့်ဒေသအပါအဝင် ရှမ်းမြောက်ဒေသရှိနေရာအများအပြားရှိ စစ်ကောင်စီတပ်များကို အောက်တိုဘာ ၂၇မှစတင်ပြီး MNDAA အပါအဝင် မဟာမိတ်တပ်များကတိုက်ခိုက်သည့် စစ်ဆင်ရေးကို ဖော်ဆောင်လျက်ရှိရာ ပြီးခဲ့သည့် ၅ရက်တာအတွင်း စစ်ကောင်စီတပ်စခန်း ၉၀ ကျော်သိမ်းပိုက်နိုင်ခဲ့ပြီးဖြစ်သည်ဟု ညီနောင်မဟာမိတ်တပ်များက အသိပေးထားသည်။
“ဒီနေ့ စစ်ရေးအခြေအနေက ကွမ်းလုံဘက်မှာ တိုက်ပွဲဖြစ်နေတယ်လို့ သိရတယ်။ အခြေအနေအသေးစိတ်ကိုတော့ အခုအချိန်ထိ မသိရသေးဘူး”ဟု MNDAA ပြောရေးဆိုခွင့်ရှိသူက ပြောသည်။
လက်ရှိညီနောင်သုံးဖွဲ့နှင့် တပ်ဆိုင်ထားသည့် စစ်ကောင်စီတပ်ဖွဲ့ဝင်များ လက်နက်ချအလင်းဝင်ရန် ညီနောင်မဟာမိတ်သုံးဖွဲ့က ယမန်နေ့တွင် ကြေညာချက်ထုတ်ပြန်ထားသည်။
လက်ရှိတွင် ကိုးကန့်ဒေသ၊ မူဆယ်၊ နမ့်ခမ်း၊ လားရှိုးနှင့် ကွတ်ခိုင်စသည့် ဒေသများ၌ မဟာမိတ်တပ်များက စစ်ကောင်စီတပ်များအား တိုက်ခိုက်လျက်ရှိသည်။
Public Service Announcement
အခြားဒေသ ၊အခြားမြို့များသို့ စစ်ဆင်ရေးများဆက်လက်ဆောင်ရွက်ရန်ရှိမရှိ MNDAA ပြောရေးဆိုခွင့်ရှိသူအား မေးမြန်းရာ “အခုလောလောဆယ်တော့ ကျနော်တို့ အခုဖော်ဆောင်နေတဲ့ နေရာတွေမှာပဲရှိပါတယ်။ အခြားထွေထွေထူးထူးတော့ မရှိပါဘူး”ဟု ပြောသည်။
