လက်ရှိခေတ်ကာလတွင် လက်နက်ကိုင် အနိုင်ကျင့်ပြီး အာဏာကို မတရားရယူထားသည့် စစ်အာဏာရှင်များသည် ပြည်တွင်းသာမက နိုင်ငံတကာ မျက်နှာစာ၌ပါ ဘက်ပေါင်းစုံ ဆင့်ကျင်မှုများနှင့် ရင်ဆိုင်နေရကြောင်း မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး(ABSDF)- ကျောင်းသားတပ်မတော် ဥက္ကဋ္ဌ ရဲဘော်သံခဲက ပြောသည်။
မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး(ABSDF) ၃၅ နှစ်ပြည့် အခမ်းအနားသို့ ဥက္ကဋ္ဌ ရဲဘော်သံခန်းက သဝဏ်လွှာပေးပို့ခဲ့ရာ အထက်ပါအတိုင်းပြောကြားသည်။
“အချိန် ၃နှစ်နီးပါး ကြာလာခဲ့ပေမယ့် ပြည်သူလူထုရဲ့ ဆန့်ကျင်တော်လှန်မှုတွေဟာ တစ်ရက်မှ ရပ်တန့်ခဲ့တာ မရှိဘူး။ အကြမ်းမဖက်လှုပ်ရှားမှုမှသည် ရရာလက်နက်စွဲကိုင်တော်လှန်တဲ့အထိ ပုံစံမျိုးစုံနဲ့ ဆက်လက်တိုက်ပွဲဝင်နေကြဆဲပဲ။ စစ်ကောင်စီက အကြမ်းဖက် ဖြိုခွဲဖိနှပ်လေ တိုင်း
ရင်းသား ပြည်သူတစ်ရပ်လုံးက ငြိမ်မသွားဘဲ ပိုကြီးများတဲ့ ပြန်လည်အုံကြွတော်လှန်မှုတွေနှင့်သာ စစ်အုပ်စုဟာ ရင်ဆိုင်နေရတယ်။ဒီကနေ့ မြင်နေရတဲ့ တိုင်းရင်းသား လက်နက်ကိုင်အဖွဲ့အစည်းများ ဦးဆောင်ပြီး ရန်သူကို ထိထိရောက်ရောက် ပြန်လည်ချေမှုန်းနေတာဟာ လက်တွေ့ ဥပမာတွေပဲဖြစ်တယ်”ဟု ရဲဘော်သံခဲက ပြောသည်။
စစ်အာဏာရှင်များက လေသံပစ်နေသည့် ရွေးကောက်ပွဲ၊ စစ်အာဏာရှင်က ဖိတ်ခေါ်သည့် ငြိမ်းချမ်းရေးစကားပြောပွဲများကို အယုံအကြည်မရှိဟုလည်း ၎င်းကဆိုသည်။
Public Service Announcement
“စစ်အာဏာရှင် ဖိတ်ခေါ်တဲ့ငြိမ်းချမ်းရေးစကား ပြောပွဲဆိုတာ လူထုလိုလားတဲ့ နိုင်ငံရေး အဖြေထုတ်ဖို့ မဟုတ်ဘူး။ အဓိပ္ပါယ်ပြည့်၀တဲ့ နိုင်ငံရေး တွေ့ဆုံဆွေးနွေးပွဲ မဟုတ်လို့ လူထုကလည်း အယုံအကြည်မရှိဘူး။ဒီနေ့ကာလမှာ စစ်အာဏာရှင် ဆန့်ကျင်ရေးအတွက် တိုက်ပွဲဝင်မယ့် အင်အားစု အသစ်တွေ ပေါ်လာတာနဲ့အတူ မဟာမိတ်အဖွဲ့တွေအဖြစ် ညီညီညွတ်ညွတ် လက်တွဲ တိုက်ပွဲဝင်ရေးဟာ သမိုင်းရဲ့ တောင်းဆိုချက် ဖြစ်တယ်” ဟု ရဲဘော်သံခဲက ပြောသည်။
ABSDFသည် စစ်အာဏာရှင်စနစ် ဆန့်ကျင်ရေး ဒီမိုကရေစီရေးနှင့် လူ့အခွင့်အရေး ၊ ပြည်တွင်း ငြိမ်းချမ်းရေး ၊ ဖက်ဒရယ်စနစ် ပေါ်ထွန်းရေးစသည့် နိုင်ငံရေး ဦးတည်ချက် ၄ရပ် အောက်၌ စစ်ရေး ၊ နိုင်ငံရေး ၊သံတမန်ရေး နည်းလမ်းများဖြင့် တိုက်ပွဲဝင်နေသည့်အဖွဲ့ဖြစ်ကြောင်း ပြောသည်။
“ မကဒတ ရဲ့ သမုင်းကို ကိုယ်စီ ကျရာနေရာကနေ ထုဆစ်ခဲ့ကြတယ်။ ထုဆစ်နေဆဲ လည်းဖြစ်တယ်။ ဒီသမိုင်းတန်ဖိုးကို လက်ရှိ တာဝန်ထမ်းဆောင်နေသူများ ရော တချိန်က ထမ်းဆောင်ခဲ့ကြသူများအားလုံးထိန်းသိမ်းဖို့အားလုံးမှာ တာဝန်ရှိသလို ညီညီညွတ်ညွတ် ဆက်လက် လက်တွဲထားဖို့လိုတယ်” ဟုလည်း ရဲဘော်သံခဲက ပြောသည်။
ABSDFသည် ကချင်၊ စစ်ကိုင်း၊ ကရင်နှင့် မွန်ဒေသများ၌ တော်လှန်ရေးအင်အားစုများဖြင့် ပူးပေါင်းပြီး စစ်ကောင်စီကို တိုက်ခိုက်လျက်ရှိသည်။
