ယခုရက်ပိုင်း PDF များနှင့် ထိပ်တိုက်မတွေ့ရန် ကြိုးပမ်းနေဟုဆို
ရှမ်းပြည်နယ်မြောက်ပိုင်း၌ ညီနောင်မဟာမိတ် သုံးဖွဲ့ က စခန်းသိမ်းတိုက်ပွဲများ ဆင်နွှဲနေချိန်တွင် စစ်ကိုင်းတိုင်းရောက် စစ်ကောင်စီတပ်ဖွဲ့များက စစ်ရေးမဖော်ဆောင်တော့ဘဲ PDF များအား ရှောင်ကွင်း၍ နေရာရွှေ့ပြောင်းနေကြောင်း ပြည်သူ့ကာကွယ်ရေးတပ်ဖွဲ့များက ပြောသည်။
“ကျားဘီလူးဆိုပြီး ကြွေးကြော်ထားတဲ့ ပုလဲနယ် က စစ်ကြောင်းက အခုဆို မြို့နဲ့ ဝေးတဲ့ ရွာတွေဖက်ကို လျှောက်သွားနေတယ်။ PDF တွေနဲ့ ထိပ်တိုက်မဆုံအောင်သွားနေတာ။ ကျနော်တို့ သိရသလောက် ရှမ်းမြောက်ကိုပို့မှာစိုးလို့ တပ်ရင်းတွေနဲ့ ဝေးသထက်ဝေးအောင် သွားနေတာ”ဟု ပုလဲမြို့နယ်မှ ပြည်သူ့ကာကွယ်ရေးရဲဘော်တစ်ဦးက ပြောသည်။
ကနီနှင့် ယင်းမာပင်မြို့နယ်စပ်၌ လနှင့်ချီတပ်စွဲထားသော အင်အား ၂၀၀ခန့်ရှိ စစ်ကောင်စီစစ်ကြောင်းမှာလည်း ယခုရက်ပိုင်းအတွင်း တိုက်ပွဲမဖော်ဆောင်တော့ဘဲ ပြည်သူ့ကာကွယ်ရေးတပ်ဖွဲ့ရှိရနေရာများကို ရှောင်ကွင်းသွားလာနေကြောင်း ယင်းမာပင်မြို့နယ်မှ ပြည်သူ့ကာကွယ်ရေးရဲဘော်တစ်ဦးက ပြောသည်။
” အရင်ရက်က တိုက်ပွဲထဲ ဖမ်းမိထားတဲ့ စစ်ကောင်စီတပ်ဖွဲ့ဝင်တွေက ပြောတယ်။ သူတို့ မတိုက်ချင်တော့ဘူးတဲ့။ အကုန် ထွက်ပြေးချင်နေတာတဲ့။ ဒါပေမယ့် တကယ်ပြောတာလား၊ ကြောက်ပြီး ပြောတာလား မသိဘူးပေါ့”ဟု အဆိုပါ ရဲဘော်က ပြောသည်။
ကသာမြို့နယ်တွင် ယမန်နေ့(နိုဝင်ဘာ၂ရက်)က ဧရာဝတီမြစ်ကြောင်းအတိုင်း ထီးချိုင့်မြို့မှ တက်လာသည့် စစ်ကောင်စီရေယာဉ်ကို တိုက်ခိုက်ရာ ပြန်မပစ်ဘဲ မောင်းနှင်ထွက်ပြေးသွားသည်ဟု ကသာမြို့မှ ပြည်သူ့အုပ်ချုပ်ရေးအဖွဲ့ဝင်တစ်ဦးက ပြောသည်။
Public Service Announcement
“ပြန်မပစ်ဘဲ ပြေးတာဗျ။ အရင်ကဆို ရမ်းသမ်းပစ်တာ။ အခုက လုံးဝမပစ်ဘဲ ပြေးတာ” ဟု ကာကွယ်ရေးရဲဘော်တစ်ဦးကပြောသည်။
ရှမ်းပြည်နယ်မြောက်ပိုင်းနှင့် ကချင်ပြည်နယ်၊ စစ်ကိုင်းတိုင်းမြို့နယ်အချို့၌ မြောက်ပိုင်းမဟာမိတ်သုံးဖွဲ့က ခေါင်းဆောင်ကာ ၁၀၂၇ စစ်ဆင်ရေးကို အောက်တိုဘာလ ၂၇ရက်မှစကာ ဆင်နွှဲနေပြီး စစ်ကောင်စီစခန်းများအား တိုက်ခိုက်နေသည်။ ယနေ့သည် ၁၀၂၇ စစ်ဆင်ရေး ၈ ရက်မြောက်ဖြစ်ပြီး မြောက်ပိုင်းမဟာမိတ်တပ်ဖွဲ့များက စစ်ရေးအရ အသာစီးယူပြီး စခန်းသိမ်းတိုက်ပွဲများ ဆင်နွှဲနေသည်။
