မကွေးတိုင်း၊ ဂန့်ဂေါမြို့နယ်၊ မင်းရွာနယ်မြေရဲစခန်းကို ယနေ့နံနက်ပိုင်းက အပြီးသတ် တိုက်ခိုက်သိမ်းလိုက်ကြောင်း ဒေသခံ PDFတပ်ရင်းများက အတည်ပြုလိုက်သည်။
NUG ကာကွယ်ရေးဝန်ကြီးဌာနလက်အောက်ခံဂန့်ဂေါခရိုင်တပ်ရင်း ၆ ရင်း၊ ABSDF နှင့်ဒေသခံရပ်ကျေးပကဖတို့က ယနေ့ မနက်ပိုင်းတွင် တိုက်ခိုက်သိမ်းပိုက်လိုက်ခြင်းဖြစ်သည်။
NUG ကာကွယ်ရေးဝန်ကြီးဌာနလက်အောက်ခံတပ်ရင်းများမှာ တပ်ရင်း အမှတ်(၁)၊ တပ်ရင်း (၇)၊ တပ်ရင်း (၁၁)၊ တပ်ရင်း (၁၂) တပ်ရင်း (၁၄)နှင့် တပ်ရင်း (၁၉)တိုဖြစ်ကြသည်။
မင်းရွာရဲစခန်းကို ယနေ့ နံနက် ၆နာရီခန့်က ဝင်ရောက်တိုက်ခိုက်ခဲ့ပြီး ၉နာရီ၂၀မိနစ်တွင် စခန်းကို အပြီးသတ်သိမ်းပိုက်နိုင်ခဲ့ပြီး စခန်းကို မီးရှို့ခဲ့သည်ဟု ကာကွယ်ရေးတပ်ဖွဲ့များထံမှစုံစမ်းသိရှိရသည်။ စစ်ကောင်စီတပ်သား ၁၀ ဦးကိုခန့်ကိုလည်း ကာကွယ်ရေးတပ်များက အရှင်ဖမ်းမိထားကြောင်းလည်း သတင်းအရင်းအမြစ်များကပြောသည်။
“မင်းရွာရဲစခန်း အပြတ်သိမ်းပြီး အသေးစိတ်အချက်အလက်ထပ်ပေးမည်”ဟု PDF-ဂန့်ဂေါ ( ခရိုင်တပ်ရင်း -၁၂)က အတည်ပြုထုတ်ပြန်ထားသည်။
Public Service Announcement
ထိုစခန်းကို တော်လှန်ရေးအဖွဲ့များ ယခင်ကတိုက်ခိုက်ဖူးသော်လည်း ယနေ့တွင်မှ စခန်းသိမ်းနိုင်ခဲ့ခြင်းဖြစ်သည်။
ထိုရဲစခန်းကို သိမ်းပိုက်ပြီးနောက် စစ်ကောင်စီတပ်က လေကြောင်းမှ ဗုံးကျဲတိုက်ခိုက်ခဲ့သေးသည်ဟုလည်း ဒေသခံတစ်ဦးကပြောသည်။
မင်းရွာရဲစခန်းသိမ်းပိုက်ခံရကြောင်း စစ်ကောင်စီဝါဒဖြန့် ချန်နယ်များကလည်း ရေးသားအတည်ပြုနေကြသည်။
ကလေး-ဂန့်ဂေါလမ်းမပေါ် စစ်ကောင်စီစခန်းများကို ဒေသခံကာကွယ်ရေးတပ်များက ယနေ့မနက်ပိုင်းတွင်တပြိုင်နက်ဝင်ရောက်တိုက်ခဲ့သည်။ ကလေးမြို့တောင်ဘက်ရှိ မြောက်စီးရွာရှိ စစ်ကောင်စီစခန်းကိုလည်း ဒေသခံကာကွယ်ရေးတပ်များက သိမ်းပိုက်ထားပြီးဖြစ်သည်။
