မကွေးတိုင်း၊ ပေါက်မြို့နယ်တောင်ပိုင်းတွင် ၃ ရက်ဆက် ရွာသွန်းခဲ့သောမိုးကြောင့် စပါးနှင့် ကြက်သွန်ပျိုးခင်းများ ရေမြုပ်၍ ပျက်စီးဆုံးရှုံးမှုများဖြစ်ခဲ့ကြောင်း ဒေသတွင်းသတင်းရင်းမြစ်များက ပြောသည်။
နိုဝင်ဘာ ၁၆ ရက်မှ ၁၉ ရက်အထိ ၃ ရက်ဆက် မိုးကောင်းခဲ့၍ ရိတ်သိမ်းပြီးစ စပါးများနှင့် ကြက်သွန်ပျိုးခင်းများ ရေမြုပ်ကာ ဆုံးရှုံးမှုများရှိကြောင်း ဒေသခံများက ပြောသည်။
စပါးစိုက်ဧကတစ်ရာကျော်ခန့် ပျက်စီးနိုင်ကြောင်း ပေါက်တောင်ပိုင်း ပြည်သူ့လုံခြုံရေးတပ်ဖွဲ့၏ ပြန်ကြားရေးတာဝန်ခံက ခန့်မှန်းသည်။
“အခုရာသီက စပါးရိတ်သိမ်းချိန်ဖြစ်တယ်။ တချို့ကရိတ်ပြီးတော့ လယ်ထဲမှာပဲချထားတော့မိုးကရွာတော့ လယ်ထဲရေပြည့်ပြီး စကားလှိုင်းတွေရေစိုတာတို့ မရိတ်ရသေးတဲ့အခင်းတွေရေစိုတာတို့သီးနှံပျက်တာ။ အရင်ကတင်း၆၀လောက်ရတဲ့အခင်းက အခုတင်း၄၀လောက်ပဲရတော့တယ်။”ဟုပေါက်တောင်ပိုင်း ပြည်သူ့လုံခြုံရေးတပ်ဖွဲ့၏ ပြန်ကြားရေးတာဝန်ခံက ပြောသည်။
ထို့အပြင် ကြက်သွန်ပျိုးခင်းများလည်း အများအပြား ရေမြုပ်ခဲ့ပြီး မျိုးစေ့ဖိုး၊မြေသြဇာနှင့် လုပ်သားခများ ဆုံးရှုံးခဲ့ကြောင်း ဒေသခံများထံမှ သိရသည်။
Public Service Announcement
စပါးမချွေရသေးသော ကောက်လှိုင်းများအား ပေါက်တောင်ပိုင်း ပလဖ ဇုန်(၂) ဒေါင်းမင်းစခန်းမှ ပလဖတပ်ဖွဲ့ ဝင်များက တောင်သူများနှင့်အတူ သွားရောက်ကူညီလုပ်ကိုင်ပေးခဲ့ကြောင်း သိရသည်။
ပြီးခဲ့သည့် မေလအတွင်းကလည်း မိုခါမုန်တိုင်းကြောင့် ပေါက်နယ်အတွင်းရှိ သီးနှံခင်းများ ပျက်စီးခဲ့သေးသည်။
