ပဲခူးတိုင်း၊ ဝေါမြို့နယ်ရှိ စစ်ကောင်စီလက် အောက်ခံ သူရဲသမိန်ကျေးရွာရဲစခန်းအား ကရင်အမျိုးသားလွတ်မြောက်ရေးတပ်မတော်(KNLA)၊ PDF ပူးပေါင်းတပ်က စီးနင်းတိုက်ခိုက်ခဲ့ရာ ရဲစခန်းမှူးအပါအဝင် ကိုးဦးသေဆုံးကြောင်း ပူးပေါင်းအဖွဲ့တွင်ပါဝင်သည့် ဒေသတော်လှန်ရေးတပ်ဖွဲ့မှ တာဝန်ရှိသူတစ်ဦးက ပြောသည်။
စစ်ကောင်စီတပ်နှင့် ရဲ ပူးပေါင်းအင်အား ၅၀ခန့်ရှိ သူရဲသမိန်နယ်မြေရဲစခန်းကို နိုဝင်ဘာ ၂၇ ရက်နံနက် ၅ နာရီခန့်တွင် KNLA၊ PDF ပူးပေါင်းတပ်မက လက်နက်ကြီး၊ လက်နက်ငယ်များဖြင့် စီးနင်းတိုက်ခိုက်ခဲ့ခြင်း ဖြစ်သည်။
![(ဝေါမြို့နယ်ရှိ စစ်ကောင်စီလက်အောက်ခံ သူရဲသမိန်ရဲစခန်းအား စီးနင်းတိုက်ခိုက်ခဲ့စဥ်။ ဓာတ်ပုံ - ဝေါ(ပကဖ))](https://i0.wp.com/www.ludunwayoo.com/wp-content/uploads/2023/11/406805944_686115110253951_8161405496442989222_n.jpg?resize=544%2C296&ssl=1)
စခန်းသိမ်းတိုက်ပွဲအတွင်း စစ်ကောင်စီဘက်မှ တပ်သားသုံးဦး၊ စခန်းမှူးအပါအဝင် ရဲလေးဦး၊ ပျူစောထီးတစ်ဦးနှင့် ရာအိမ်မှူးတစ်ဦးသေဆုံးပြီး သေနတ်လေးလက် သိမ်းဆည်းရရှိကာ KNLA၊ PDF ပူးပေါင်းတပ်ဖွဲ့မှ ရဲဘော်တစ်ဦးကျဆုံးခဲ့ကြောင်း ဒေသတော်လှန်ရေးတပ်ဖွဲ့မှ တာဝန်ရှိသူက အတည်ပြုသည်။
“သူရဲသမိန်စခန်းမှာ တာဝန်ကျတဲ့ ဗိုလ်မှူးကအရပ်ဝတ်လဲပြီး ရှေ့ဆုံးကပြေးတော့တာပဲ” ဟု ၎င်းတာဝန်ရှိသူက ပြောသည်။
အဆိုပါ သူရဲသမိန်ရဲစခန်းအား စီးနင်းတိုက်ခိုက် နေစဥ် စခန်းအားသိမ်းပိုက်ရရှိခဲ့သော်လည်း မီးရှို့ဖျက်ဆီးရန် မီးခြစ်အရံသင့်ပါမလာခြင်း၊ အနီးဝန်းကျင်ကျေးရွာများဖြစ်သော မြစ်ကျိုး၊ လက်ပံ၊ အညာစု စသည့်ကျေးရွာများတွင် အထိုင်ချထားသော စစ်ကောင်စီတပ်များက လက်နက်ကြီးပစ်ကူပေးခြင်းတို့ကြောင့် တပ်ပြန်ဆုတ်ခဲ့ရကြောင်း စုံစမ်းသိရသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
Public Service Announcement
![(ဝေါမြို့နယ်ရှိ စစ်ကောင်စီလက်အောက်ခံ သူရဲသမိန်ရဲစခန်းအား စီးနင်းတိုက်ခိုက်ခဲ့စဥ်။ ဓာတ်ပုံ - ဝေါ(ပကဖ))](https://i0.wp.com/www.ludunwayoo.com/wp-content/uploads/2023/11/406313864_686115070253955_757843627967497506_n.jpg?resize=508%2C308&ssl=1)
အလားတူ ဝေါမြို့နယ် တဘက်ကမ်း စစ်တောင်းမြစ်အနေညက်ဘက်ခြမ်းရှိ ရွှေကျင်မြို့နယ် ကွမ်းဆိပ်ကျေးရွာအခြေစိုက် စစ်ကောင်စီ၏ ခမရ (၅၉၈) တပ်စခန်းကိုလည်း KNLA၊ PDF ပူးပေါင်းတပ်များက နိုဝင်ဘာ ၂၇ရက် နံနက် ၅ နာရီခန့်တွင် တပြိုင်နက်တိုက်ခိုက်ခဲ့ပြီး တိုက်ပွဲအခြေအနေအား အသေးစိပ်မသိရသေးပေ။
လက်ရှိအခြေအနေတွင် စစ်ကောင်စီလက် အောက်ခံ သူရဲသမိန်ကျေးရွာနယ်မြေရဲစခန်း တိုက်ခိုက်ခံရပြီးနောက် ဝေါမြို့နယ်အတွင်း ညမထွက်ရအမိန့်ထုတ်ပြန်ထားပြီး ပျူစောထီးအဖွဲ့သို့ဝင်ရန် ကျေးရွာတစ်ရွာလျှင် အင်အား ၃၀ ဦးပေးရမည်ဟု သတင်းများထွက်ပေါ်နေ၍ ဒေသခံများ စိုးရိမ်ပူပန်လျှက်ရှိကြောင်း စုံစမ်းသိရသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)