ထားအိ/People’s Spring
နိုင်ငံတဝန်း ပြင်းထန်သောတိုက်ပွဲများအကြား အိုးအိမ်စွန့်ခွာထွက်ပြေးရသည့် အရပ်သားပြည်သူ ၃ သန်းကျော်ရှိလာခဲ့ပြီဟု ကုလသမဂ္ဂမြန်မာရုံးက ယမန်နေ့(မေလ ၃ ရက်)တွင်သတင်းထုတ်ပြန်သည်။
အထက်ပါ အလွန်ဆိုးရွားသည့်မှတ်တမ်းမှာ လွန်ခဲ့သည့် ၆ လအတွင်း ၅၀ ရာခိုင်နှုန်း သိသာစွာမြင့်တက်လာခြင်းဖြစ်သည်ဟု ကုလသမဂ္ဂက ဆိုသည်။
![(တိုက်ပွဲများနှင့် စစ်ကောင်စီတပ် လေကြောင်း၊လက်နက်ကြီး အန္တရာယ်ကြောင့် ထွက်ပြေးတိမ်းရှောင်နေရသော ပြည်သူများ။ဓါတ်ပုံ-CJ)](https://i0.wp.com/www.ludunwayoo.com/wp-content/uploads/2024/05/438301187_774109244787870_975017351830510576_n.jpg?resize=750%2C375&ssl=1)
၂၀၂၁ ဖေဖော်ဝါရီ စစ်အာဏာသိမ်းချိန်ကတည်းက ပိုမိုနက်ရှိုင်းလာသော လူသားချင်းစာနာမှုဆိုင်ရာအကျပ်အတည်းနှင့်အတူ မြန်မာနိုင်ငံသည် ၂၀၂၄ ခုနှစ်တွင် ချောက်ကမ်းပါး၌ ရပ်တည်နေပြီး တိုင်းပြည်၏ နေရာအနှံ့အပြားတွင်ဖြစ်ပွားနေသော ပဋိပက္ခများကြောင့် ဘေးလွတ်ရာသို့ ထွက်ပြေးခဲ့ရသည့် အိုးအိမ်စွန့်ခွာသူဦးရေမှာ စံချိန်တင်များပြားခဲ့သည်။ ပြည်တွင်းနေရပ်စွန့်ခွာသူဦးရေ ၃ သန်းအနက် ၂.၇ သန်းကျော်မှာ စစ်အာဏာသိမ်းမှုနောက်ပိုင်း ဖြစ်ပေါ်လာသော ပဋိပက္ခနှင့် မလုံခြုံမှုကြောင့် ထွက်ပြေးစွန့်ခွာခဲ့ရခြင်းဖြစ်သည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
အဆိုပါလူဦးရေ ၃ သန်း အနက် သုံးပုံတစ်ပုံ(၁သန်းခန့်)မှာ ကလေးငယ်များဖြစ်ပြီး ၎င်းတို့မှာ ပဋိပက္ခကြောင့် ပညာရေးနှင့် အနာဂတ်များ ဆုံးရှုံးပျက်စီးခဲ့ရသည်ဟု ကုလသမဂ္ဂက ခန့်မှန်းသည်။
![(တိုက်ပွဲများနှင့် စစ်ကောင်စီတပ် လေကြောင်း၊လက်နက်ကြီး အန္တရာယ်ကြောင့် ထွက်ပြေးတိမ်းရှောင်နေရသော ပြည်သူများ။ဓါတ်ပုံ-CJ)](https://i0.wp.com/www.ludunwayoo.com/wp-content/uploads/2024/05/438299942_774109278121200_8508310034274073024_n.jpg?resize=384%2C512&ssl=1)
ပြီးခဲ့သည့် ၂၀၂၃ အောက်တိုဘာနောက်ပိုင်း တိုက်ပွဲပြင်းထန်လာမှုနှင့်အတူ နိုင်ငံတဝန်း လေကြောင်းတိုက်ခိုက်မှု မြင့်တက်လာခဲ့ပြီး နေရပ်စွန့်ခွာသူဦးရေသည်လည်း လျင်မြန်စွာမြင့်မားလာခဲ့ကြောင်း ထုတ်ပြန်သည်။
ထို့အပြင် နိုင်ငံအတွင်း လူသားချင်းစာနာမှုဆိုင်ရာအကျပ်အတည်းရင်ဆိုင်နေရသည့်အရေအတွက်မှာ ၁၈.၆ သန်းခန့်ရှိပြီး ယခင်နှစ်ထက် ၁ သန်းကျော် မြင့်တက်လာခြင်းဖြစ်သည်။ လူသားချင်းစာနာမှု အကူအညီလိုအပ်နေသူ ၁၈.၆သန်းအနက် ၆ သန်းမှာ ကလေးငယ်များ ဖြစ်သည်ဟုဆိုသည်။
![(တိုက်ပွဲများနှင့် စစ်ကောင်စီတပ် လေကြောင်း၊လက်နက်ကြီး အန္တရာယ်ကြောင့် ထွက်ပြေးတိမ်းရှောင်နေရသော ပြည်သူများ။ဓါတ်ပုံ-CJ)](https://i0.wp.com/www.ludunwayoo.com/wp-content/uploads/2024/05/438145891_774110138121114_5269311920758007217_n.jpg?resize=880%2C587&ssl=1)
နိုင်ငံ၏ အနောက်မြောက်ပိုင်း ချင်း၊ မကွေးနှင့် စစ်ကိုင်းတို့တွင်လည်း အိုးအိမ်စွန့်ခွာသူအရေအတွက် အမြင့်မားဆုံးဖြစ်ပြီး အဆိုပါဒေသများတွင် ၁.၅ သန်းခန့် ရှိသည်။ နိုင်ငံအရှေ့တောင်ပိုင်းရှိ ကရင်နီ၊ ပဲခူး၊ ကရင်၊ ရှမ်းပြည်တောင်ပိုင်း၊ မွန်နှင့် တနင်္သာရီတိုင်းတို့တွင် အိုးအိမ်စွန့်ခွာသူအရေအတွက် ၉ သိန်းကျော်ရှိပြီး ရခိုင်ပြည်နယ်တွင် ၃၅၆,၀၀၀ ခန့်ရှိကြောင်း ကုလသမဂ္ဂက ဆိုသည်။
သို့ရာတွင် ကရင်နှင့် ကရင်နီဒေသရှိ စစ်ဘေးရှောင်ဒုက္ခသည်များအရေးလုပ်ဆောင်နေသူများ၏ မှတ်တမ်းအရ မြေပြင်ကိန်းဂဏန်းသည် ကုလသမဂ္ဂ၏ စာရင်းထက် များစွာများပြားကြောင်း သိရသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)