မိထက်/People’s Spring
မကွေးတိုင်း၊ ဂန့်ဂေါမြို့နယ်တွင် ခလရ(၅၀) တပ်ရင်းမှ စစ်ကောင်စီနှင့်ပျူစောထီး ပူးပေါင်းစစ်ကြောင်းက ချောင်းကူးတံတားတစ်စင်းအားဖောက်ခွဲဖျက်ဆီးပြီး အရပ်သားလေးဦးအား ဖမ်းဆီးသွားကြောင်း သတင်းရရှိသည်။
စစ်ကောင်စီတပ်နှင့် ပျူစောထီးပူးပေါင်းစစ်ကြောင်းသည် ယနေ့(ဇူလိုင် ၂၀ရက်) နံနက် ၂နာရီခန့်တွင် ရှုံးရှီရွာနှင့် အောင်မြင်ကျေးရွာသို့ စစ်ကြောင်းထိုးလာခြင်းဟု ဂန့်ဂေါမြို့နယ်ပအဖတာဝန်ရှိသူတစ်ဦးက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
၎င်းက “ရှုံးရှီရွာနဲ့အောင်မြင်ရွာကို စစ်ကြောင်းနှစ်ကြောင်းခွဲ ဝင်လာတာ။ မနက်အစောကြီးဝင်လာတော့ ဒေသခံတွေ ပြေးရတယ်ဗျာ။ လေးယောက်ကို ဖမ်းသွားတယ်”ဟု ပြောသည်။
အောင်မြင်ရွာနှင့် ရှုံးရှီရွာချင်းဆက် ချောင်းကူးတံတားအား မိုင်းခွဲဖျက်ဆီးခဲ့ကြောင်း သတင်းရရှိသည်။
” အဲဒီတံတားက ဂန့်ဂေါအနောက်ပိုင်းမှာ ဒေသခံတွေအတွက် အရမ်းအရေးပါတဲ့တံတား။ မိုင်းခွဲတာ မပျက်လို့ အကြိမ်ကြိမ်ခွဲဖျက်ဆီးသွားတာ” ဟု ဒေသခံတစ်ဦးက ပြောသည်။
စစ်ကြောင်းသည် ယနေ့ ညနေပိုင်းတွင် ဂန့်ဂေါမြို့အတွင်း ပြန်ဝင်သွားပြီဟု သတင်းရရှိသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)