ဟန်နွေ/People’s Spring
ချင်းပြည်နယ် ဟားခါးမြို့မရဲစခန်းကို ယနေ့တွင် တိုက်ခိုက်သိမ်းပိုက်ရာ ရဲ ၄ဦးသေဆုံးခဲ့ကြောင်း ဟားခါးမြို့နယ် ချင်းဒေသကာကွယ်ရေးတပ်(CDF-Hakha)က သတင်းထုတ်ပြန်သည်။
ဇူလိုင် ၂၀ရက် နံနက် ၅နာရီခွဲတွင် Operation Rung အမည်ဖြင့် မြို့မရဲစခန်းကို တိုက်ခိုက်သိမ်းပိုက်ခဲ့ရာ တိုက်ပွဲအတွင်း ရဲ ၄ဦးသေဆုံးပြီး အများအပြား ဒဏ်ရာရခဲ့ဟု ဖော်ပြသည်။
Public Service Announcement
ထို့ပြင် လက်နက်ခဲယမ်းများ သိမ်းဆည်းရရှိခဲ့ကြောင်း ဓာတ်ပုံမှတ်တမ်း ဖော်ပြအသိပေးသည်။ ဓာတ်ပုံပါအရ စစ်ကောင်စီရဲများ ကိုင်ဆောင်သည့် လက်နက် ၂၃လက်ထက်မနည်းနှင့် ကျည်များကို ပြသထားသည်။
ရဲစခန်းရှိ အမျိုးသား ၄၉ဦး၊ အမျိုးသမီး ၁၃ဦးစုစုပေါင်း အကျဉ်းသား ၆၂ဦးတို့ကိုလည်း ကယ်တင်နိုင်ခဲ့သည်ဟု ဆိုသည်။
CDF ဟားခါးအနေဖြင့် အာဏာရှင်စနစ် အမြစ်ပြတ် ချေမှုန်းရေး နှင့် ဖက်ဒရယ် ဒီမိုကရေစီပြည်ထောင်စု ပေါ်ပေါက်ရေးအတွက် ဆုံးခန်းတိုင်အောင် ဆက်လက် တိုက်ပွဲ ဖော်ဆောင်သွားမည်ဖြစ်၍ ပြည်သူလူထုများ ပူးပေါင်းပါဝင်ကြရန်လည်း မေတ္တာရပ်ခံထားသည်။
