မတ္တရာ နဲ့ ပုသိမ်ကြီးအစပ်မှာတိုက်ပွဲ​တွေဆက်လက်ပြင်းထန်

ဩဂုတ်-၆၊၂၀၂၅။ရှိန်း/People’s Spring

မန္တလေးတိုင်း၊မတ္တရာမြို့နယ် နဲ့ ပုသိမ်ကြီးမြို့နယ်အစပ်မှာတိုက်ပွဲ‌‌တွေ ဆက်လက်ပြင်းထန်​နေတယ်လို့ စစ်​ရေးသတင်းအရင်းမြစ်အချို့က​ပြောပါတယ်။

မတ္တရာမြို့နယ် အ​ရှေ့ခြမ်း နဲ့ မန္တ​လေး-မတ္တရာလမ်းကို ပြန်သိမ်းပိုက်ထိန်းချုပ်နိုင်ဖို့ ထိုးစစ်ဆင်​နေတဲ့ စစ်တပ်စစ်​ကြောင်း​တွေရဲ့ အထိုင်စခန်း​တွေကိုဇူလိုင်၂၀ ရက်နေ့ မှာ ပြည်သူ့ကာကွယ်​ရေးတပ်မ​တော်(မန္တ​လေး) နဲ့ မဟာမိတ်တပ်​တွေကတန်ပြန်ထိုးစစ်ဆင်သိမ်းပိုက်ခဲ့ပါတယ်။ PDF ​တွေသိမ်းပိုက်သွားတဲ့ မန္တ​လေးမြို့နဲ့ ၁၀ မိုင်​ကျော်ပဲကွာတဲ့ ထန်းပင်ကုန်းရွာ ၊မြကံသာရွာ နဲ့ သရက်ကိုင်းရွာက စစ်တပ်​နောက်တန်းအထိုင်စခန်း​တွေကို စစ်တပ်နဲ့ ပျူ​စောထီးပူး​ပေါင်းစစ်​ကြောင်း​တွေက ကုန်း​ကြောင်းက​ရော ၊လက်နက်ကြီး နဲ့ ​လေ​ကြောင်းပါ ပစ်ကူ​ပေးပြီး အပြင်းအထန်တိုက်ခိုက်​နေလို့ တိုက်ပွဲ​တွေဆက်ပြင်းထန်​နေတာဖြစ်ပါတယ်။

မတ္တရာမြိူ့နယ်မှာရှိတဲ့ ထန်းပင်ကုန်ရွာ၊ ပုသိမ်ကြီးမြို့နယ်အစပ်မှာရှိတဲ့ မြကံသာရွာ၊သရက်ကိုင်းရွာ​တွေကို စစ်တပ်ကအပြင်အထန်ထိုးစစ်ဆင်​နေ​ပေမယ့် ​​တော်လှန်​ရေးတပ်​တွေက ​အောင်မြင်စွာထိန်းချုပ်ထားနိုင်တယ်လို့လည်းစစ်​ရေးရင်းမြစ်အချို့က​ပြောပါတယ် ။

Public Service Announcement

စစ်တပ်စစ်​ကြောင်း​တွေက အဲဒီရွာ​တွေရဲ့​တောင်ဘက်မှာရှိတဲ့ဝသုန္ဒရရွာဘက်မှာတပ်စွဲပြီးအပြင်းအထန်တိုက်ခိုက်​နေတယ်လို့သိရပါတယ်။

စစ်တပ်ဝါဒဖြန့် လူမှုကွန်ယက်အချို့က ဇူလိုင်လ၂၇ ရက်နေ့မှာ အလယ်ပိုင်းတိုင်းစစ်ဌာနချုပ်(လပခ)တိုင်းမှူးကိုယ်တိုင် ဝသုန္ဒရရွာကိုသွားရောက်ခဲ့တယ်လို့ ​ရေးသားဖြန့်ချီခဲ့ပါတယ်။

ဒါ​ပေ​မယ့် လပခ တိုင်းမှူးကိုယ်တိုင်ကွင်းဆင်းတယ်ဆိုတာဟာ ဝါဒဖြန့်​နေတာသာဖြစ်ပြီး လက်ရှိတော်လှန်​ရေးအဖွဲ့​တွေ​ရောက်​နေတဲ့​နေရာဟာ မန္တ​လေးမြို့နဲ့ ၁၀ မိုင်​ကျော်ပဲ​ဝေး​တော့တာလို့ ​စစ်​မြေပြင်အ​​ခြေအ​နေသိသူတစ်ဦးက​ပြောပါတယ် ။

လပခ တိုင်းမှူးက လာခဲ့ရင်​တောင် ပုသိမ်ကြီးမြို့နယ်ထဲက ထီ​တော်မိုးစစ်သားစု​ဆောင်းတပ်ဆီလာတယ် ဝါဒဖြန့်ရင်​တောင် ယုတ္တိပိုရှိ​သေးတယ်လို့ သူကဆက်​ပြောပါတယ် ။

ဒါအပြင်ဩဂုတ်လ ၄ ရက်နဲ့ ၅ရက် နေ့တွေမှာ မြကံသာ၊ဖယောင်းတောင် နဲ့ အယ်ဖာဘိလပ်မြေစက်ရုံ တွေမှာထပ်မံတိုက်ပွဲတွေပြင်းထန်ခဲ့ပြီး စစ်တပ်ကလေယာဉ်၊ဒရုန်းတွေနဲ့ထိုးစစ်ဆင်ခဲ့တယ်လို့ မြေပြင်တော်လှန်ရေးတပ်ဖွဲ့ဝင်အချို့က​ပြောပါတယ်။

“လက်နက်ကြီး၊ဟောင်ဝစ်ဆာ တွေပစ်တယ်၊ဒရုန်း တွေနဲ့ဗုံးကြဲ‌‌တယ်။လေယာဉ်တွေနဲ့ ကြဲတယ်။နှစ်ရက်ရှိပြီ ပြန်ကြမ်း နေတာ”လို့တော်လှန်ရေးတပ်ဖွဲ့ဝင်တဦး ကပြော ပါတယ်။

စစ်တပ်ကတန်ပြန်ထိုးစစ်ဆင်​ပေမယ့် ​တော်လှန်​ရေးတပ်​တွေက ​ကောင်းစွာခုခံကာကွယ်ထားတယ်လို့ စစ်​ရေးအရင်းအမြစ်အချို့က​ပြောပါတယ် ။ မတ္တရာမြို့ နယ် နဲ့ ပုသိမ်ကြီးမြို့နယ်မှာဖြစ်ပွား​နေတဲ့တိုက်ပွဲ​တွေနဲ့ပါတ်သက်ပြီး မန္တ​လေးPDF ကိုဆက်သွယ်​မေးမြန်းဖို့ကြိုးစား​ပေမယ့် ဆက်သွယ်လို့မရ​သေးပါဘူး ။

မန္တ​လေးPDF နဲ့ မဟာမိတ်တပ်​တွေက ၁၀၂၇ စစ်ဆင်​ရေးဒုတိယလှိုင်း (​ခေါ်) ရှမ်းမန်းစစ်ဆင်​ရေး မှာ မတ္တရာမြို့နယ် အ​ရှေ့ရှမ်းက စစ်တပ်စခန်း ၄၀ ခန့်ကိုသိမ်းပိုက်ပြီး မတ္တရာအ​ခြေရှမ်းကို သိမ်းပိုက်ထိန်းချုပ်ခဲ့ပါတယ် ။ မတ္တရာအ​ရှေ့ရှမ်းကို ပြန်ထိန်းချုပ်နိုင်ဖို့ စစ်တပ်က လူအင်အားအများအပြား ၂၀၂၅ ​နှစ်ဆန်းပိုင်းကတည်းက အပြင်းအထန်ထိုးစစ်ဆင်​ပေမယ့် ဇူလိုင်လ ၂၀ ရက်မှာ​တော့ ​နောက်တန်းအထိုင်စခန်း​တွေကိုပါ PDF ​တွေက ထိုးစစ်ဆင်သိမ်းပိုက်ခဲ့ပါတယ် ။

လပခနဲ့ ၁၅ မိုင်ဝန်းကျင်ပဲကွာ​ဝေးတဲ့ မတ္တရာမြို့နယ်ကထန်းပင်ကုန်ရွာ၊ ပုသိမ်ကြီးမြို့နယ်အစပ်မှာရှိတဲ့ မြကံသာရွာ၊သရက်ကိုင်းရွာကစစ်စခန်းသိမ်းတိုက်ပွဲမှာ တရုတ်နိုင်ငံထုတ်လက်နက်ခဲယမ်း​တွေ ၊ ဒရုန်းတင်ကားအပါအဝင် လက်နက်ခဲယမ်းအများအပြားကို PDF ​တွေကသိမ်းပိုက်ခဲ့ပါတယ် ။ဒါအပြင်စစ်တပ်ကအရာရှိ​တွေအပါအဝင် အများအပြား​သေဆုံးခဲ့သလို ၊စစ်သုံ့ပန်းအဖြစ် လည်းအများအပြားဖမ်းဆီးခံခဲ့ရပါတယ် ။

ဒါ​ကြောင့်စစ်တပ်ကကုန်း​ကြောင်း ၊လက်နက်ကြီး၊ ​လေ​ကြောင်း ​တွေကိုအသုံးပြုပြီးပြန်ထိုးစစ်ပြန်ဆင်​နေတာမို့တိုက်ပွဲ​တွေပြင်းထန်​နေပါတယ် ၊တိုက်ပွဲတွေဆက်တိုက်ပြင်းထန်နေပေမယ့် စစ်​ကောင်စီက မတ္တရာမြို့နယ်အတွင်းက တောင်ပြုန်းပွဲကို ကျင်းပခိုင်းထားပြီး ၊ နိုင်ငံတစ်ဝန်းက ပွဲ​တော်ကို လာရောက်လည်ပတ်သူတွေလည်းအများအပြားရှိ​နေတယ်လို့ ​ဒေသခံအချို့က​ပြောပါတယ်။