သြဂုတ် – ၁၇ ၊၂၀၂၅ ၊ နိုင်ပကောင်း/People’s Spring
ကရင်နယ်ခြားစောင့်တပ်(BGF)တပ်ဖွဲ့ဝင်တွေကရင်အမျိုးသားတပ်မ တော်(KNA)ဘက်တံဆိပ်ကိုပြောင်းလဲတပ်ဆင် အသုံးပြုနေပြီး လာမယ့် နိုဝင်ဘာလမှာ KNA အမည်နဲ့ တရားဝင်ပြောင်းလဲ ဖွဲ့စည်းသွားမယ်လို့ နယ်ခြားစောင့်တပ် သတင်းရင်းမြစ်တွေက ပြောပါတယ်။
ကရင်အမျိုးသားတပ်မတော်(KNA)အဖြစ် ပြောင်းလဲဖွဲ့စည်းသွားမယ်လို့ ပြီးခဲ့တဲ့ ဇူလိုင် ၂၀ ရက် က ကရင်ပြည်နယ်၊ လှိုင်းဘွဲမြို့နယ်၊ မြိုင်ကြီးငူဒေသမှာ ကျင်းပပြုလုပ်သွားခဲ့တဲ့ တွေ့ဆုံပွဲတစ်ခုမှာ ကရင်နယ်ခြားစောင့်တပ်(BGF) ထိပ်ပိုင်းခေါင်းဆောင်တွေက တရားဝင်ပြောဆိုထားခဲ့တာပါ။
လက်ရှိမှာBGFတပ်ဖွဲ့ဝင်တွေတချို့ဟာကရင်အမျိုးသားတပ်မတော် (KNA)ဘက်တံဆိပ်ကို ပြောင်းလဲတပ်ဆင်အသုံးပြုနေကြတာတွေရှိသလို BGF ဘက်တံဆိပ်ကိုလည်း ဆက်လက်တပ်ဆင်အသုံးပြုနေကြတဲ့ တပ်ဖွဲ့ဝင်တွေလည်း ရှိကြတယ်လို့ BGF သတင်းရင်းမြစ်က ပြောပါတယ်။
Public Service Announcement
“တချို့တပ်ဖွဲ့တွေကတော့ KNA ဘက်တံဆိပ်တပ်လိုက်ပြီ၊ ဘက်တံဆိပ်တပ်တဲ့အဖွဲ့က ဗျူဟာလက်အောက်ခံက တပ်တွေပေါ့” လို့ အဆိုပါသတင်းရင်းမြစ်က ပြောပါတယ်။
လာမယ့် နိုဝင်ဘာလထဲမှာ BGF ကနေ KNA အဖြစ် တရားဝင်ပြောင်းလဲသွားမှာဖြစ်တယ်လို့လည်း အဲ့ဒီသတင်းရင်းမြစ်က အသိပေးပါတယ်။
ပြောင်းလဲဖွဲ့စည်းသွားမယ့် ကရင်အမျိုးသားတပ်မတော်(KNA)ထဲမှာ တပ်ရင်းပေါင်း ၆၀ ကျော်ပါရှိပြီး စစ်ဒေသမှူး ၄ ဦး၊ ဗျူဟာမှူး ၉ ဦး ပါဝင်မယ်လို့ BGF စစ်ရေးချုပ်ဖြစ်သူ ဗိုလ်မှူးချုပ်စောကြာအင်းက အသိပေးထားပါတယ်။
အရင်က ကရင်နယ်ခြားစောင့်တပ်(BGF)ထဲမှာ စစ်တပ်က ဖွဲ့စည်းပါဝင်ပေးထားတဲ့ တပ်က အရာရှိတွေပါဝင် ပူးပေါင်းနေပြီး BGF တပ်ရင်း (၁၃)ရင်းသာ ရှိခဲ့ကာ တပ်အင်အားကလည်း ထောင်ဂဏန်းသာ ရှိခဲ့တာပါ။
အခုလက်ရှိမှာတော့ ကရင်နယ်ခြားစောင့်တပ်(BGF)ဟာ တပ်တိုးချဲ့တည်ဆောက်ပြီး လက်နက်၊ လူအင်အားတွေကို ဖြည့်ဆည်းနေတဲ့အပြင် အခြေခံစစ်သင်တန်း၊ ကွန်မန်ဒိုသင်တန်း၊ စနိုက်ပါ လက်နက်ကြီး ဒရုန်း စတဲ့ သင်တန်းတွေကို ဖွင့်လှစ်သင်ကြားလျက်ရှိပါတယ်။
ပြီးခဲ့တဲ့ ရက်ပိုင်း ဩဂုတ်လ ၁၅ ရက်က ဆိုရင် BGF တပ်ထိန်းချုပ်ရာ ကရင်ပြည်နယ်၊ မြ၀တီခရိုင်၊ သေ့ကတေကျေးရွာမှာ BGF အမှတ် ၂ စစ်ဒေသက ဖွင့်လှစ်ထားတဲ့ လူအင်အား ၅၀၀ ကျော်ပါတဲ့ အပတ်စဉ် ၁၉ အခြေခံစစ်သင်တန်းဆင်းပွဲ ပြုလုပ်ခဲ့ပါတယ်။
၃ လကျော် ကြာမြင့်တဲ့ အပတ်စဉ် ၁၉ အခြေခံစစ်သင်တန်းမှာ တပ်ဖွဲ့ဝင်အင်အား ၅၀၀ ကျော် ပါရှိပြီး သင်တန်းဆင်းပွဲမှာ BGF အမှတ် ၂ စစ်ဒေသမှူး ဗိုလ်မှူးချုပ်စောတင်ဝင်း၊ အမှတ် ၄ စစ်ဒေသမှူး ဗိုလ်မှူးချုပ်စောမို့သို၊ ဗိုလ်မှူးချုပ်စောမောင်ဝင်း အပါအဝင် ဒီမိုကရေစီအကျိုးပြုကရင်တပ်မတော်(DKBA) ဒုစစ်ဦးစီးချုပ် ဒုဗိုလ်ချုပ်ကြီးစောရွှေဝလည်း တက်ရောက်ခဲ့ပါတယ်။
