တောင်အာဖရိက နိုင်ငံမှာ အဆိပ်အတောက် ဓာတ်ငွေ့ ယိုစိမ့်မှုကြောင့် လူ ၁၆ ဦး သေဆုံးသွားကြောင်း သိရပါတယ်။
ဂျိုဟန်နက်စ်ဘာ့ဂ်မြို့ အရှေ့ပိုင်းမှာရှိတဲ့ ဘော့ခ်စ်ဘက်ဂ် မြို့လေးမှာ နိုက်ထရိတ် အောက်ဆိုက်လို့ ယူဆရတဲ့ အဆိပ်အတောက် ဓာတ်ငွေ့တွေ ရှူရှိုက်မိလို့ သေဆုံးသူတွေထဲမှာ ကလေးတွေ၊ အမျိုးသမီးတွေလည်း ပါဝင်ခဲ့ပါတယ်။
အာဏာပိုင်တွေက ဇူလိုင် ၅ ရက် ဓာတ်ငွေ့ ယိုစိမ့်မှုဟာ အနားမှာရှိတဲ့ တရားမဝင် ရွှေသတ္တုမိုင်းတွင်း တစ်ခုနဲ့ ဆက်စပ်လိမ့်မယ်လို့ ပြောပါတယ်။ နောက်ဆက်တွဲ စုံစမ်းမှုတွေကိုတော့ ဆက်လက် လုပ်ဆောင်နေဆဲပါ။
ဇာမာဇာမာတွေလို့ ခေါ်ဝေါ်တဲ့ တရားမဝင် ရွှေတူးဖော်သူတွေဟာ မိုင်းတွင်းဟောင်းတွေထဲကနေ သယ်ယူလာတဲ့ မြေစိုင်ခဲတွေထဲက ရွှေသတ္တုရိုင်းတွေကို စစ်ထုတ်ယူရာမှာ နိုက်ထရိတ် အောက်ဆိုက် ဓာတ်ငွေ့ကို သုံးလေ့ ရှိပါတယ်။ လူတွေ သေဆုံးတဲ့ ဧရိယာနားမှာ ယိုစိမ့်နေတဲ့ ဓာတ်ငွေ့ဘူးတောင့် တစ်ခုကို ရဲတွေက ရှာတွေ့ခဲ့ပါတယ်။
သေဆုံးသူတွေကို အဲဒီ ဓာတ်ငွေ့ဘူးတောင့်နဲ့ မီတာ ၁၀၀ ပတ်လည်အတွင်းမှာ တွေ့ရှိခဲ့တာလို့လည်း သိရပါတယ်။ သေဆုံးသူ ၁၆ ဦးအပြင် နောက်ထပ် ဆေးရုံပို့ရတဲ့ လူနာမျိုး မရှိဘူးလို့လည်း အာဏာပိုင်တွေက အတည်ပြုပါတယ်။ ဒါပေမဲ့ ရှာမတွေ့သေးတဲ့ နောက်ထပ် ရုပ်အလောင်းတွေ ရှိနေမှာကို စိုးရိမ်လို့ လိုက်လံ ရှာဖွေမှုတွေတော့ လုပ်ဆောင်နေပါတယ်။
ပြီးခဲ့တဲ့နှစ် ခရစ္စမတ် အကြိုနေ့ကလည်း ဘော့ခ်စ်ဘက်ဂ် မြို့မှာပဲ ဓာတ်ငွေ့တင် ထရပ်ကားတစ်စီး ပေါက်ကွဲမှုကြောင့် လူ ၄၁ ဦး အသက်ဆုံးရှုံးခဲ့ဖူးပါတယ်။
