စစ်ကိုင်းတိုင်း၊ ချောင်းဦးမြို့နယ်တွင် ပျူစောထီးကျေးရွာနှစ်ရွာအား ဝင်တိုက်နေချိန် စစ်ကူလာသည့် စစ်ကောင်စီတပ်စစ်ကြောင်း နှစ်ခုနှင့် တိုက်ပွဲအတွင်း ပြည်သူ့ရဲဘော် သုံးဦးကျဆုံးကာ စစ်သားသုံးဦးလည်းသေဆုံးခဲ့ကြောင်း ချောင်းဦးမြို့နယ်တော်လှန် ရေးတပ်- CRAအဖွဲ့ ၏ တာဝန်ခံက ပြောသည်။
ယမန်နေ့ (ဇူလိုင် ၅ရက်)နံနက် ၃နာရီခန့်က ချောင်းဦးမြို့နယ်ရှိ ပျူစောထီးကြီးစိုးရာ ကံကြီးကုန်းရွာနှင့် ကင်မွန်းတော်ရွာရှိ စစ်ကောင်စီတပ်ကို ဒေသတွင်းတော်လှန်ရေးအင်အားစုများပူးပေါင်းပြီး ဝင်ရောက်တိုက်ခိုက်ခဲ့သည်။
ထိုအချိန် အမြင့်ရဲစခန်းမှ စစ်ကူရန်ထွက်လာသော စစ်ကောင်စီ၏ အင်အား ၃ဝခန့်ပါ ကွန်မန်ဒိုစစ်ကြောင်း နှစ်ကြောင်းနှင့် တိုက်ပွဲဖြစ်ပွားခဲ့ကြောင်း CRAအဖွဲ့ တာဝန်ခံက ပြောသည်။
အဆိုပါတိုက်ပွဲတွင် စစ်သား သုံးဦးသေဆုံးပြီး CRA တပ်ဖွဲ့မှ ရဲဘော်နှစ်ဦး၊ Farmers Revolution Force တပ်ရင်း(၈)မှ ရဲဘော်တစ်ဦးကျဆုံးခဲ့ရကြောင်း အထက်ပါတာဝန်ခံက ပြောသည်။
“သူတို့က ကွန်မန်ဒိုတပ်စုဆိုတော့ လက်နက်အပြည့်အစုံပါတယ်။ ကျွန်တော်တို့က ခံစစ်ဆိုတော့ခံပစ်ရတာ။သူတို့ဘက်က RPGလေးချက်ထုတဲ့အချိန်မှာ ကျွန်တော်တို့ဘန်ကာ ပွင့်တယ်။ ရဲဘော်နှစ်ယောက်ဒဏ်ရာရတဲ့အချိန်မှာ ပစ်ဆုတ်ဆုတ်တာ။ ဒဏ်ရာရတဲ့သူတွေကြားကို (၆၀) မမလက်နက်ကြီးကျတာ။ အဲဒီမှာ သုံးယောက်ကျသွားတာ။”ဟု CRAအဖွဲ့၏ တာဝန်ခံက ပြောသည်။
သို့သော် ပျူရွာနှစ်ရွာ၏ ထိခိုက်မှုအခြေအနေမှာ မသိရသေးဘဲ အထိအခိုက်များနိုင်သည်ဟု ဆိုသည်။
ထို့အပြင် စစ်ကောင်စီတပ်ကလည်း လေကြောင်းမှပစ်ကူခဲ့ကြောင်း၊ မွန်းလွဲပိုင်းတွင် စစ်ကောင်စီတပ်သည် ဝယာအုပ်စုအတွင်းရှိ နေအိမ်များကို မီးရှို့ဖျက်ဆီးခဲ့ကြောင်း ဒေသခံများက ပြောသည်။
ယမန်နေ့ကတိုက်ပွဲတွင် ကျည်အမြောက်အများသုံးစွဲခဲ့ရ၍ အကူအညီများလည်း လိုအပ်နေသည်ဟု CRA အဖွဲ့က ပြောသည်။
ချောင်းဦးနယ်အတွင်း တိုက်ပွဲကြောင့် စစ်ကောင်စီတပ်သည် မုံရွာမြို့ဘက်မှ လက်နက်ကြီးပစ် ကူ ပစ်ခတ်ခဲ့ပြီး မုံရွာ – မန္တလေးလမ်းမကြီးကိုပါ ယာယီပိတ်ထားခဲ့သည်။
