အစ္စရေး ဝန်ကြီးချုပ် ဘင်ဂျမင် နေတန်ညာဟုက သူ့ရဲ့ စစ်တပ်တွေဟာ ဂါဇာ ကမ်းမြှောင်ဒေသမှာ မြေပြင်ထိုးစစ် အလုံးအရင်း ဆင်နွှဲဖို့ အသင့်ရှိနေပြီလို့ ပြောကြားခဲ့ပေမယ့် ဘယ်နေ့လဲ ဆိုတာကိုတော့ ထုတ်ပြန်မသွားခဲ့ပါဘူး။
နေတန်ညာဟုက အောက်တိုဘာ ၇ ရက်မှာ ဟားမားစ် ပြောက်ကျားတွေရဲ့ ကျူးကျော်စစ်ပြုမှုကို ခံရကတည်းက အစ္စရေးဟာ မြေပြင်ထိုးစစ်အတွက် စုစည်း ပြင်ဆင်နေခဲ့ပြီး အခုအခါ အင်ပြည့်အားပြည့် အခြေအနေမျိုးထိ ရောက်ရှိလာပြီလို့ ရုပ်မြင်သံကြား မိန့်ခွန်းမှာ ပြောကြားသွားခဲ့ပါတယ်။
ဟားမားစ်တွေက အစ္စရေးရဲ့ အချုပ်အခြာ အာဏာကို လွယ်လွယ်ကူကူ ထိပါးနိုင်ခဲ့တာနဲ့ ပတ်သက်ပြီး သူအပါအဝင် တာဝန်ရှိသူ အားလုံးဟာ တိတိကျကျ ဖြေရှင်းဖို့၊ တာဝန်ယူဖို့ လိုကြောင်း၊ ဒါပေမဲ့ အဲဒီကိစ္စကို စစ်ပွဲပြီးမှ ဆုံးဖြတ်ရမှာဖြစ်ကြောင်းလည်း ဆိုပါတယ်။
မြေပြင်ထိုးစစ် အစီအမံတွေနဲ့ ပတ်သက်ပြီး အစ္စရေး အစိုးရနဲ့ စစ်တပ်ကြား သဘောထား ကွဲလွဲမှုတွေ ရှိနေကြောင်း ကောလာဟလတချို့ ထွက်ပေါ်နေပေမယ့် နေတန်ယာဟုကတော့ အာဏာပိုင် ပုဂ္ဂိုလ်တွေ အားလုံးကြားမှာ တစိတ်တဝှမ်းတည်း ရှိနှင့်နေကြောင်း ပြောကြားခဲ့ပါတယ်။
သူက စစ်ဆင်ရေးနဲ့ ပတ်သက်တဲ့ အစီအမံတွေကိုတော့ အကျယ်တဝင့် ရှင်းလင်းနေမှာ မဟုတ်ကြောင်း၊ လောလောဆယ် အစ္စရေးရဲ့ လေကြောင်းတိုက်ခိုက်မှုတွေမှာ အကြမ်းဖက်သမား ထောင်ဂဏန်းလောက်ကို ရှင်းလင်းထားနိုင်ခဲ့ပြီး ဒီကိစ္စဟာ အစသာ ရှိသေးတာကို နားလည်သင့်ကြောင်းလည်း ခြိမ်းခြောက်သွားပါတယ်။
Public Service Announcement
နောက်ပြီး ဂါဇာ မြောက်ပိုင်းမှာ နေထိုင်တဲ့ ပါလက်စတိုင်း ပြည်သူတွေ အနေနဲ့လည်း တောင်ပိုင်းကို အမြန်ဆုံး ရွှေ့ပြောင်းကြဖို့ သူက ထပ်သတိပေးသွားပါတယ်။
ဟားမားစ်တွေက နယ်စပ်စည်းရိုးကို ကျော်ဖြတ်ပြီး အစ္စရေး မြို့ရွာတွေကို ဝင်ရောက်တိုက်ခိုက်မှုမှာ လူပေါင်း ၁၄၀၀ ကျော်လောက် သေဆုံးပြီး ၂၀၀ ကျော်ကို ဓားစာခံအဖြစ် ဖမ်းဆီး ခေါ်ဆောင်သွားတာ ခံခဲ့ရပါတယ်။ အဲဒီဖြစ်စဉ်နဲ့ ပတ်သက်လို့ အစ္စရေးရဲ့ ထောက်လှမ်းရေးဌာနနဲ့ လုံခြုံရေး အစီအမံတွေအပေါ် အကြီးအကျယ် ဝေဖန်ထိုးနှက်မှုတွေလည်း ထွက်ပေါ်ခဲ့ပါတယ်။
