ကျွန်းစု၊ မြိတ်နှင့် တနင်္သာရီမြို့နယ်တို့တွင် စစ်ကောင်စီလက်အောက်ခံ ပျူစောထီးစခန်းစီးနင်းတိုက်ခိုက်သည့်အပြင် စစ်ကောင်စီတပ်ယာဥ်နှစ်စီးလည်း ကြားဖြတ်တိုက်ခိုက်ခဲ့ကြောင်း တနင်္သာရီရိုးမပြည်သူ့ကာကွယ်ရေးအဖွဲ့(တနင်္သာရီ-ပကဖ)က အသိပေးထုတ်ပြန်သည်။
အောက်တိုဘာ ၂၄ရက် ည ၁၂နာရီခန့်က ကျွန်းစုမြို့နယ်၊ မင်းဂုတ်ကျေးရွာရှိ ပျူစောထီးစခန်းကို တနင်္သာရီ(ပကဖ)၊ ပုလော (ပကဖ)နှင့် ကျွန်းစု(ပကဖ)တို့ပူးပေါင်းပြီး ဝင်ရောက်စီးနင်းတိုက်ခိုက်ခဲ့ကြောင်း ဖော်ပြသည်။
“တစ်ယောက်တော့ ထိခိုက်တယ်ကြားပေမယ့် အတည်မပြုနိုင်သေးဘူး”ဟု ပျူစောထီးစခန်းတိုက်ခိုက်မှုနှင့် စပ်လျဥ်းပြီး ကျွန်းစု(ပကဖ)မှ တာ ဝန်ရှိသူတစ်ဦးက People’s Spring သို့ ပြော သည်။
အဆိုပါ မင်းဂုတ်ရွာပျူစောထီးစခန်းတွင် ကျွန်းစု လယ်တောပိုင်းပျူစောထီးများအပါအဝင် အင်အား ၁၂၀ခန့်ရှိပြီး တိုက်ခိုက်မှုအတွင်း တော်လှန်ရေးပူးပေါင်းတပ်ဖွဲ့များ အထိအခိုက်မရှိခဲ့ကြောင်း ၎င်းက ဆက်ပြောသည်။
အလားတူ မင်းဂုတ်ရွာပျူစောထီးစခန်းစီးနင်းခံရခြင်းကြောင့် အောက်တိုဘာ ၂၅ ရက် နံနက် ၁၂နာရီခန့်တွင် မြိတ်မြို့ဘက်မှ တပ်ကူလာသော စစ်ကောင်စီတပ်ယာဥ်တစ်စီးကို တုန်းဗျောအုပ်စု၊ တောင်ပုရွာအနီးတွင် တနင်္သာရီ(ပကဖ)၊ပုလော(ပကဖ)နှင့် မြိတ်(ပကဖ)တို့ပူးပေါင်းပြီး မိုင်းဆွဲတိုက် ခိုက်ခဲ့ကြောင်း သိရသည်။
Public Service Announcement
“ကားမှာ အင်အား ၁၀ကျော်လောက်ပါတယ်။ မိုင်းဆွဲပြီး အဝေးကစောင့်ကြည့်တော့ကားထဲမှ စကစ တစ်ကောင်တွားထွက်လာတာ တွေ့ရတယ်။ ထိခိုက်သေဆုံးတော့အသေး စိတ်မသိရသေးပါဘူးခင်ဗျာ”ဟု တောင်ပုရွာအနီးမိုင်းဆွဲတိုက်ခိုက်မှုကို မြိတ်(ပကဖ)မှ တာဝန်ရှိသူတစ်ဦးက People’s Spring သို့ ပြောသည်။
အဆိုပါ ကြားဖြတ်တိုက်ခိုက်မှုတွင် စစ်ကောင်စီတပ်သား အများအပြားထိခိုက်သေဆုံးမှုရှိသည်ဟု မြေပြင်သတင်း ပေးပို့ချက် ရရှိထားကြောင်း တနင်္သာရီ (ပကဖ)၏ ထုတ်ပြန်ချက်တွင် ဖော်ပြထားသည်။
ယမန်နေ့(အောက်တိုဘာ ၂၅)နံနက် ၁၁ နာရီကျော်ကလည်း တနင်္သာရီမြို့နယ် မော်တုန်းကျေးရွာအခြေစိုက် အမှတ်(၃၀၆)အမြောက်တပ်သို့ ဇဝဲဘက်မှလာသော စစ်ကောင်စီတပ်သားများလိုက်ပါလာသည့် Vigo ယာဉ်တစ်စီးကို တနင်္သာရီ(ပကဖ)မှ ကြားဖြတ်တိုက်ခိုက်ခဲ့ကြောင်း အသိပေးသည်။
“ထိုတိုက်ခတ်မှုမှာ ထိခိုက်သေဆုံးမှု စုံစမ်းနေဆဲဖြစ်ပါသည်”ဟု ၎င်းတပ်ဖွဲ့က ဆိုသည်။
အထက်ပါ သုံးမြို့နယ် ပူးပေါင်းစစ်ဆင်ရေးများတွင် ပူးပေါင်းတပ်ဖွဲ့များဘက်မှ တစ်စုံတစ်ရာထိခိုက်မှုမရှိဘဲ စစ်ရေးလှုပ်ရှားမှုများ အောင်မြင်ခဲ့ကြောင်း တနင်္သာရီ(ပကဖ)က ထုတ်ပြန်သည်။
ယခုအခါတွင် ပြည်သူလူထုများနှင့် ခရီးသွားပြည်သူများအနေဖြင့် သတိကြီးစွာထားပြီးသွားလာနေထိုင်ပေးကြပါရန် တော်လှန်ရေးတပ်ဖွဲ့များက ထပ်မံသတိပေးမေတ္တာရပ်ခံထားသည်။
