အီရန်နိုင်ငံ ပိုင်နက်ထဲထိ အမေရိကန်ရဲ့ တိုက်ခိုက်မှုတွေ လုပ်လာနိုင်သလားဆိုတဲ့ မေးခွန်းကို အမေရိကန် အစိုးရရဲ့ ထိပ်တန်း အရာရှိ တစ်ဦးက အတိအလင်း ငြင်းဆိုမှု မရှိဘဲ မတင်မကျသာ ဖြေကြားခဲ့ပါတယ်။
သမ္မတ ဂျိုးဘိုင်ဒန်ရဲ့ အမျိုးသား လုံခြုံရေး အကြံပေး အရာရှိ ဂျိတ်ခ် ဆူလီဗန်က အီရတ်နဲ့ ဆီးရီးယား နိုင်ငံတွေထဲက အီရန် မဟာမိတ် ပြောက်ကျား အင်အားစုတွေကို ပြီးခဲ့တဲ့ သီတင်းပတ်ကုန်မှာ အမေရိကန်က လေကြောင်းတိုက်ခိုက်မှုတွေ လုပ်ဆောင်ခဲ့တာမျိုး အီရန် ပိုင်နက်ထဲမှာပါ ဖြစ်မလာဘူးလို့ အာမမခံနိုင်ကြောင်း အရိပ်အမြွက် မှတ်ချက် ပေးသွားပါတယ်။
NBCနဲ့ အင်တာဗျူးမှာ အီရန်နိုင်ငံ ပိုင်နက်ထဲထိ အမေရိကန်ရဲ့ စစ်ဆင်ရေးတွေ လုပ်ဆောင်လာနိုင်သလားဆိုတဲ့ မေးခွန်းအပေါ် ဆူလီဗန်က သတင်းဌာန တစ်ခုနဲ့ ဆွေးနွေးတဲ့ အချိန်မှာ စစ်ရေးအရ ဖြစ်နိုင်ခြေတွေကို ထည့်မပြောလိုကြောင်း၊ ဒါပေမဲ့ သေချာတာ တစ်ခုကတော့ အမေရိကန် ပြည်သူတွေအပေါ် ရန်လို တိုက်ခိုက်တဲ့ လုပ်ရပ်တိုင်းကို ပြင်းပြင်းထန်ထန် လက်တုံ့ပြန်ဖို့ စိတ်ပိုင်းဖြတ်ထားကြောင်း၊ တစ်ဖက်မှာလည်း ပဋိပက္ခတွေ ပိုမို ကျယ်ပြန့်မလာစေဖို့ သမ္မတက ဆန္ဒရှိကြောင်း တိုက်ရိုက် မဟုတ်ဘဲ ရှောင်လွှဲ ဖြေဆိုခဲ့ပါတယ်။
အင်တာဗျူးသူက ဒါဆိုရင် အမေရိကန်ဟာ အီရန်ပိုင်နက်ထဲမှာ စစ်ဆင်ရေးတွေ လုပ်ဆောင်နိုင်ခြေကို မငြင်းဆန်ဘူးလားလို့ ထပ်မေးတဲ့အခါ ဆူလီဗန်က သူဟာ ပထမ အဖြေကိုပဲ ပြန်ဖြေမှာ ဖြစ်ကြောင်း၊ အမေရိကန်ဟာ ရွေးချယ်စရာ မှန်သမျှကို စဉ်းစားနေပြီး အတိအကျကိုတော့ ဘာမှ မပြောလိုသေးကြောင်း တုံ့ပြန်ခဲ့ပါတယ်။
ဇန်နဝါရီ လကုန်ပိုင်းက ဆီးရီးယား နိုင်ငံနဲ့ နယ်စပ်နားက ဂျော်ဒန်နိုင်ငံ ပိုင်နက်ထဲမှာ အမေရိကန် စစ်စခန်းတစ်ခုကို ဒရုန်းနဲ့ တိုက်ခိုက်ခံရတာကြောင့် အမေရိကန် တပ်ဖွဲ့ဝင် ၃ ဦး သေဆုံးခဲ့ပါတယ်။ အဲဒီလုပ်ရပ်ကို အီရန်က ထောက်ပံ့ပေးထားတဲ့ စစ်သွေးကြွ အဖွဲ့တွေက ကျူးလွန်တယ်လို့ အမေရိကန်က စွပ်စွဲပြီး ပြီးခဲ့တဲ့ သီတင်းပတ်ကုန်က အီရတ်နဲ့ ဆီးရီးယား ပိုင်နက်ထဲမှာ လေကြောင်း တိုက်ခိုက်မှုတွေ လုပ်ဆောင်ခဲ့တာပါ။
Public Service Announcement
အီရန်ရဲ့ မဟာမိတ် အင်အားစုတွေကို ပစ်မှတ်ထားတဲ့ အဲဒီ တိုက်ခိုက်မှုတွေမှာ အရပ်သား တချို့ အပါအဝင် ၂၀ ထက်မနည်း သေဆုံးခဲ့ပြီး သက်ဆိုင်ရာ နိုင်ငံနှစ်ခုရဲ့ အစိုးရတွေက အမေရိကန်ဟာ အချုပ်အခြာအာဏာ ပိုင်ဆိုင်မှုကို ထိပါးချိုးဖောက်ရာ ရောက်ခဲ့တယ်လို့ စွပ်စွဲထားကြပါတယ်။
ကိုးကား: NBC
