ဖိလစ်ပိုင်နိုင်ငံ၊ မနီလာမြို့တော်ရဲ့ အကြီးဆုံး စာရင်းဝင် ကျူးကျော်ရပ်ကွက် တစ်ခုမှာ မီးလောင်မှု ဖြစ်ပွားလို့ အိမ်ခြေ ၁၀၀၀ နီးပါး ဆုံးရှုံးခဲ့ရပါတယ်။
နိုဝင်ဘာ ၂၄ ရက်နေ့ မီးလောင်မှုမှာ ပျက်စီး ဆုံးရှုံးမှု ပမာဏကို တိတိကျကျ မသိရသေးပေမယ့် အရမ်း နီးနီးကပ်ကပ် တည်ဆောက်ထားတဲ့ တဲအိမ်လေးတွေ ရာပေါင်း တော်တော်များများကနေ ၁၀၀၀ နီးပါးလောက်ထိ ပျက်စီးခဲ့တယ်လို့ ယူဆရကြောင်း မနီလာ မီးသတ်ဌာနက ထုတ်ပြန်ပါတယ်။
မီးလောင်နေတဲ့ ကာလအတွင်း မည်းနက်တဲ့ မီးခိုးလုံးကြီးတွေကို ကီလိုမီတာ အတော်များများ အကွာကနေတောင် မြင်နေခဲ့ရပါတယ်။ မီးလောင်မှု စတင်တဲ့ အကြောင်းရင်းကို တိတိကျကျ မသိရသေးပေမယ့် အိမ်တစ်လုံးရဲ့ ဒုတိယထပ်က အစပြုခဲ့တယ်လို့တော့ မျက်မြင်တွေရဲ့ အဆိုကို ကိုးကားပြီး ဒေသခံ မီဒီယာတွေက ဖော်ပြခဲ့ကြပါတယ်။
မီးလောင်မှုမှာ ထိခိုက်သေဆုံးမှုတွေ ရှိသလား ဆိုတာကိုတော့ လက်ရှိ အချိန်ထိ သတင်းမရသေးပါဘူး။ ဒရုန်းနဲ့ ရိုက်ကူးထားတဲ့ ဝေဟင် ဗီဒီယိုတွေမှာတော့ အစ္စလာ ပူတင်ဘာတို ကျေးရွာလို့ ခေါ်ဝေါ်တဲ့ မြစ်ကမ်းဘေး ကျူးကျော်ရပ်ကွက်ထဲမှာ ကျယ်ပြန့်တဲ့ မီးလောင်ပြင်ကြီး ဖြစ်ကျန်နေတာကို တွေ့ခဲ့ရပါတယ်။
Public Service Announcement
အသက် ၆၅ နှစ်အရွယ် လီယိုနီလာ အဘီယာတက်စ်ဆိုတဲ့ အမျိုးသမီးကြီးက သူဟာ ဘာပစ္စည်းမှ မသယ်နိုင်ဘဲ ကွယ်လွန်သူ ခင်ပွန်းသည်ရဲ့ အရိုးပြာ ထည့်ထားတဲ့ အိုးလေးကိုသာ ယူဆောင်လာနိုင်ခဲ့တယ်လို့ ငိုယိုမြည်တမ်းရင်း AFP သတင်းဌာနကို ပြောကြားခဲ့ပါတယ်။ သူက မီးဘေးသင့်ပြီးတဲ့နောက် ဘဝကို ဘယ်လိုပြန်စရမလဲ ဆိုတာတောင် မတွေးတတ်တော့ဘူးလို့ ဖွင့်ဟခဲ့ပါတယ်။ အဲဒီမီးလောင်မှုအတွင်း စုစုပေါင်း မိသားစု ၂၀၀၀ နီးပါးလောက်ထိ အိမ်ခြေရာမဲ့ဘဝ ရောက်သွားခဲ့တယ်လို့ ဆိုပါတယ်။
မီးသတ်တပ်ဖွဲ့ဟာ မီးသတ်ကား ၃၆ စီး၊ မီးသတ်ရေယာဉ် ၄ စီးကို အသုံးပြု မီးငြှိမ်းခဲ့ရသလို လေတပ်ကလည်း ရဟတ်ယာဉ်နှစ်စီး ပေးပို့ပြီး ကူညီစေခဲ့ပါတယ်။
ရပ်ကွက်ထဲမှာရှိတဲ့ အိမ်အများစုဟာ မီးလောင်လွယ်တဲ့ ပစ္စည်းတွေနဲ့ တည်ဆောက်ထားတာ ဖြစ်တာကြောင့်လည်း မီးကူးစက်မှုတွေကို ပိုမိုမြန်ဆန်စေခဲ့တယ်လို့ မီးသတ် ဝန်ထမ်း တစ်ဦးဖြစ်တဲ့ ဂေနယ်လီ နူနက်ဇ်က မှတ်ချက်ပေး ပြောကြားသွားခဲ့ပါတယ်။
ကိုးကား: AFP
