ဖိလစ်ပိုင် နိုင်ငံရဲ့ မြို့တော် မနီလာနားမှာ အကြီးအကျယ် မီးလောင်မှု တခုကြောင့် ကလေးတွေ အပါအဝင် လူ ၇ ဦး သေဆုံးခဲ့ကြောင်း သိရပါတယ်။
ဧပြီ ၈ ရက် ည သန်းခေါင်ကျော်နဲ့ ဧပြီ ၉ ရက် မနက်အစောပိုင်းက မနီလာတောင်ပိုင်း လူနေရပ်ကွက် တစ်ခုမှာ မီးလောင်မှု ဖြစ်ခဲ့တာပါ။ တေတေး ရပ်ကွက်ထဲက မီးလောင်မှုကြောင့် အိမ်ခြေ ၄၀ ကျော် ပြာကျသွားပြီး ကလေး ၂ ဦး အပါအဝင် ၇ ဦး သေဆုံးခဲ့တယ်လို့ ကယ်ဆယ်ရေးတွေက ပြောပါတယ်။
မီးလောင်တဲ့ ရပ်ကွက်မှာ အိမ်လေးတွေ ပြွတ်သိပ် တည်ဆောက်ထားပြီး ကျဉ်းမြောင်းရှည်လျားတဲ့ လမ်းသွယ်လေးတွေနဲ့ ဆက်သွယ် သွားလာနေရတာ ဖြစ်တာကြောင့် မီးကူးစက်တဲ့ အချိန်မှာ ဒေသခံတွေ ပိတ်မိပြီး အသက်ဆုံးရှုံးကုန်တာပါ။
သေဆုံးသူတွေထဲမှာ အသက် ၂ နှစ်နဲ့ ၁၂ နှစ်အရွယ် ကလေး ၂ ဦး ပါဝင်တယ်လို့လည်း သိရပါတယ်။ ကံဆိုးသွားတဲ့ မိသားစုတွေဟာ ဘယ်လိုမှ ထွက်ပြေးလို့ မလွတ်နိုင်လောက်အောင် မီးဝိုင်းခံရပြီး ကိုယ်ကျိုးနည်းခဲ့တာ ဖြစ်တယ်လို့ ဒေသခံတွေက ပြောပါတယ်။
ကလေးတွေ ပါဝင်တဲ့ မိသားစုဆိုရင် မီးကျွမ်းနေတဲ့ အလောင်းတွေ အချင်းချင်း ဖက်လျက်သား သေဆုံးနေတာကို ရင်နင့်စရာ ရှာတွေ့ခဲ့တာလို့ မီးသတ် တပ်ဖွဲ့ဝင်တွေက ပြောပါတယ်။
မီးဘေးကြောင့် မိသားစု ၆၀ ကျော်လောက် အိုးမဲ့အိမ်မဲ့ ဖြစ်သွားခဲ့တယ်လို့လည်း သိရပါတယ်။ မီးလောင်မှု ဖြစ်ပွားရတဲ့ အကြောင်းရင်းကိုတော့ စုံစမ်းနေဆဲဖြစ်ပြီး ဝါယာရှော့ကနေ အစပြုတယ်လို့တော့ ရဲတွေက သံသယ ရှိနေကြပါတယ်။
