သမ္မတ ဦးဝင်းမြင့်ပြန်လွတ်၊ ဒေါ်အောင်ဆန်းစုကြည်ကို နေအိမ်အကျယ်ချုပ်ပြောင်းမည့်သတင်းထွက်

နှစ်ရှည်အကျဉ်းချခံထားရသည့် သမ္မတဦးဝင်မြင့်ကို အာဏာသိမ်းစစ်ခေါင်းဆောင်က ယနေ့ (ဧပြီ ၁၇)တွင် ကျရောက်သည့် မြန်မာနှစ်ဆန်းတစ်ရက်နေ့တွင် ပြန်လည်လွတ်ပေးလိုက်ကြောင့် စစ်ဝါဒဖြန့်မီဒီယာများတွင် ဖော်ပြထားသည်။

သမ္မတ ဦးဝင်းမြင့်အား ရာဇဝတ်ကျင့်ထုံးဥပဒေ ပုဒ်မ ၄၀၁၊ ပုဒ်မခွဲ (၁) အရ “ နောက်တစ်ကြိမ် ပြစ်မှု ထပ်မံ ကျူးလွန်ပါက ထိုပြစ်ဒဏ်အပြင် ကျန်ရှိသော ပြစ်ဒဏ်များကိုပါ ဆက်လက်ကျခံရမည်” ဟူသော ချွင်းချက်ဖြင့် ပြန်လည်လွတ်ပေးလိုက်ခြင်းဖြစ်ကြောင်း စစ်တပ်ပိုင် မြဝတီရုပ်မြင်သံကြားမှတဆင့် ယနေ့တွင် ထုတ်ပြန်ခဲ့သည်။ 

အမျိုးသားဒီမိုကရေစီအဖွဲ့ချုပ်ပါတီ (NLD )ခေါင်းဆောင်တစ်ဦးလည်းဖြစ်သူ သမ္မတ ဦးဝင်းမြင့်မှာ ၂၀၂၁ ဖေဖော်ဝါရီတွင် စစ်တပ်က အာဏာသိမ်းစဉ် အစောဆုံးဖမ်းဆီးခံရသူများအနက်အပါဝင်ဖြစ်သည်။​

သမ္မတဦးဝင်းမြင့်ကို  အဂတိမှု၊ ရွေးကောက်ပွဲဆိုင်ရာစွပ်စွဲချက် ပုဒ်မ ၁၃ဝ-က ၊ ကိုဗစ်စည်းကမ်းဖောက်ဖျက်မှု၊ ဆူပူအောင်လှုံ့ဆော်မှု စသည့် ပုဒ်မ ၈ ခုဖြင့် တရားစွဲ၍ စစ်တပ်က ထောင်ဒဏ် ၁၄ နှစ်ချမှတ်ခဲ့သည်။

ယနေ့တွင် သမ္မတရာထူးယူထားသည့် ဗိုလ်ချုပ်မှူးကြီးဟောင်း မင်းအောင်လှိုင်က သမ္မတဦးဝင်းမြင့်၏ လက်ကျန်ချခံရမည့် ထောင်ဒဏ်များကို ဖြေလျော့ပေးလိုက်သည်ဟု စစ်တပ်ဝါဒဖြန့် မီဒီယာများတွင် ဖော်ပြထားသည်။

ယနေ့ ပြန်လည်လွတ်မြောက်လာသူများအနက်အတွင် သမ္မတဦးဝင်မြင့်လည်း ပါဝင်လာမည်ဟု ကြားသိရပြီး နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကိုလည်း နေအိမ်အကျယ်ချုပ်သို့ ပြောင်းရွှေ့ ချုပ်နှောင်မည်ဟု ကြားသိရကြောင်း NLDပါတီ ပြောရေးဆိုခွင့်ရှိသူ ဒေါက်တာမျိုးညွှန့်က အတည်ပြုပြောဆိုသည်။

“သမ္မတကြီးလွတ်တယ်ဆိုတဲ့ သတင်းကတော့ တခြားနေရာတွေကလည်း(အတည်ပြုတာ) Confirm လုပ်ပါတယ်။ ကျွန်တော်တို အခုနေပြည်တော်မရောက်သေးတဲ့အတွက် ကျွန်တော်တို့ကိုယ်တိုင်တော့ အတည်မပြုနိုင်ပါဘူး”ဟု ဒေါက်တာ မျိုးညွှန့်က ပြောသည်။

NLDပါတီခေါင်းဆောင် ဒေါ်အောင်ဆန်းစုကြည်ကိုလည်း နေအိမ်အကျယ်ချုပ်သို့ ပြောင်းရွှေ့ချုပ်နှောင်မည်ဟု ကြားသိရကြောင်းကိုလည်း ဒေါက်တာမျိုးညွှန့်က ပြောသည်။​ 

အမျိုးသားညီညွတ်ရေးအစိုးရ (NUG) ပြောရေးဆိုခွင့်ရှိသူ ဦးနေဘုန်းလတ်က ၎င်းတို့အနေဖြင့် သမ္မတဦးဝင်းမြင့်လွတ်လာသည့်အခြေနေကို မသိရသေးကြောင်း Myanmar Nowသို့ ပြောသည်။​ 

၂၀၂၁ ဖေဖော်ဝါရီ ၁ရက် နေပြည်တော် သမ္မတအိမ်တော်တွင် ဖမ်းဆီးခံရသူ သမ္မတ ဦးဝင်းမြင့်မှာ ကျန်းမာရေးအကြောင်းပြ၍ ရာထူးမှ နုတ်ထွက်ရန် စစ်တပ်၏ ဖိအားပေးမှုကို ငြင်းဆန်ပြီးနောက်တွင် စစ်ကောင်စီက ပုဒ်မ ၈ ခုဖြင့် တရားစွဲကာ ထောင် ၁၄ နှစ် ချထားသည်။ ထိုထဲမှ ၂ နှစ်ကို စစ်ကောင်စီက ပြန်လျှော့ပေးထားသည်။

စစ်တပ်သည် အသက် ၈၀ အရွယ် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်ကို နေပြည်တော် အချုပ်ထောင်တွင် ချုပ်နှောင်ထားခြင်းဖြစ်ပြီး အမှုပေါင်း ၁၉ မှုဖြင့် တရားစွဲဆိုပြီးနောက် ထောင်ဒဏ် ၃၃ နှစ်ထိ ချမှတ်ထားသည်။​

ယနေ့ကျရောက်သည့် မြန်မာနှစ်ဆန်းတစ်ရက်နေ့တွင် အကျဉ်းထောင်အသီးသီး၌ ချုပ်နှောင်ခံထားရသူ စုစုပေါင်း ၄၃၃၅ ဦးကို  ပြန်လည်လွှတ်ပေးမည်ဖြစ်ကြောင်း စစ်တပ်က ထုတ်ပြန်ထားသည်။​

လက်ရှိတွင် အကျဉ်းထောင်အသီးသီး၌ အကျဉ်းချခံထားရသူများကို စတင်လွတ်ပေးနေပြီ ဖြစ်ကြောင်း၊ ကနဦးကောက်ယူနိုင်သည့်စာရင်း အရ အကျဉ်းထောင် ၁၉ ခုမှ နိုင်ငံရေးအမှုဖြင့်  အကျဉ်းကျနေသူ   ၁၆၀ ကျော်သာ လွတ်မြောက်သေးကြောင်း မြန်မာနိုင်ငံလုံးဆိုင်ရာ အကျဉ်းသားများကွန်ယက် (PPNM)ထံမှ သိရသည်။​