အိန္ဒိယနယ်စပ်ကုန်သွယ်ရေး ကလေး- တမူးလမ်းကို စစ်တပ် နှစ်ဖက်ညှပ်ထိုးစစ်ဆင်

စစ်ခေါင်းဆောင်၏ အိန္ဒိယခရီးစဉ်အပြီး အိန္ဒိယ- မြန်မာနယ်စပ်ကုန်သွယ်ရေးလမ်းကြောင်းဖြစ်သည့် ကလေး- တမူးလမ်းပိုင်းကို ပြီးခဲ့သည့်ရက်ပိုင်းကစ၍ စစ်တပ်က နှစ်ဖက်ညှပ်ထိုးစစ်ဆင်နေကြောင်း သိရသည်။ 

အိန္ဒိယခရီးစဉ်တွင်  အရှိန်မြှင့်ရန် စစ်ခေါင်းဆောင် ကတိပြုခဲ့သော စီမံကိန်းများထဲမှ တစ်ခုဖြစ်သည့်  အိန္ဒိယ- မြန်မာ- ထိုင်းအဝေးပြေး လမ်းမကြီး၏ အစိတ်အပိုင်းဖြစ်သည့် ကလေး- တမူးလမ်းကို ဇွန်လ ၈ ရက်နေ့မှစ၍ ကလေးမြို့မြောက်ဘက်နှင့် တမူးမြို့တောင်ဘက်မှတဆင့် နှစ်ဖက်ညှပ်ကာ စစ်ကြောင်း ထိုးနေခြင်းဖြစ်ကြောင်း ဒေသခံများက ပြောကြသည်။ 

အိန္ဒိယနယ်စပ် တမူးမြိုနှင့် စစ်တပ်အခြေစိုက်စခန်းများရှိရာ ကလေးမြို့ပေါ်ရပ်ကွက်များကို စစ်တပ်က ထိန်းချုပ်ထားသော်လည်း မိုင် ၈၀ ခန့်ရှိသည့် ကလေး- တမူးလမ်းပိုင်းကို စစ်တပ်က အပြည့်အဝ မထိန်းချုပ်နိုင်ဘဲ ထိုလမ်းကြောင်းပေါ်ရှိ ခါမ်းပါတ်မြို့ကိုလည်း အမျိုးသားညီညွတ်ရေးအစိုးရ (NUG) က  ၂၀၂၃ နှစ်ကုန်ပိုင်းကတည်းက ထိန်းချုပ်ထားသည်။ 

ဇွန်လ ၈ ရက်တွင် တမူးမြို့တောင်ဘက် ပန်းသာရွာဘက်မှတဆင့် ခါမ်းပါတ်မြို့ဘက် ထိုးစစ်ဆင်လာသည့် စစ်တပ်စစ်ကြောင်းက နန်မွန်းတားရွာကို တော်လှန်ရေးအင်အားစုများလက်မှ ပြန်လည်ထိန်းချုပ်ရယူခဲ့ကြောင်း ဒေသခံများထံကသိရသည်။ 

နန်မွန်းတားရွာနှင့် ခါမ်းပါတ်မြို့သည် မိုင် ၂၀ ကျော်ကွာဝေးပြီး စစ်တပ်စစ်ကြောင်းက ဆက်လက် ထိုးစစ်ဆင်လာသည့်အတွက် တိုက်ပွဲများဖြစ်ပွားနေဆဲဖြစ်ကြောင်း ဒေသခံတို့က ဆိုသည်။

ကလေးမြို့ မြောက်ဘက်ပိုင်းတွင် စစ်တပ်က အင်အားဖြည့်တင်းကာ ဇွန်လပထမပတ်တွင်စ၍ မြေပြင်စစ်ကြောင်းထိုးလာသည်။ 

ပြီးခဲ့သည့် ဇွန်လ ၄ ရက်တွင် ခါမ်းပါတ်မြို့နှင့် အနီးရှိ ကနန်ရွာကိုလေကြောင်းတိုက်ခိုက်ခဲ့ပြီးနောက် ရက်ပိုင်းအတွင်း က‌လေး- တမူးလမ်းပိုင်းကို နှစ်ဖက်ညှပ်ကာ စစ်ကြောင်းများထိုးစစ်ဆင်လာခြင်း ဖြစ်သည်။ 

ထိုသို့ ကလေး- တမူးလမ်းပိုင်းကို စစ်တပ်က ထိုးစစ်ဆင်နေသည့်အတွက် ကျေးရွာပေါင်း ၂၀ ကျော်မှ ဒေသခံ ထောင်နှင့်ချီ ဘေးလွတ်ရာထွက်ပြေးတိမ်းရှောင်နေရသည်။ တမူးမြို့နယ်ဘက်ခြမ်းရှိ ကျေးရွာများမှ စစ်ဘေးရှောင်ပြည်သူများ အိန္ဒိယဘက်သို့ နယ်စပ်ဖြတ်ကျော်ထွက်ပြေးတိမ်းရှောင်ချိန် နယ်စပ်၌ စစ်ဆေးမှုများ ပိုမိုတင်းကျပ်နေကြောင်း ဒေသခံများထံကသိရသည်။ 

“အတော်အသင့်တားဆီးတာတွေတော့ ရှိတယ်။ အစစ်အဆေးလဲ ပိုတင်းကျပ်တယ်။ ပိုလုံခြုံတယ်လို့ ခံစားရတော့လည်း နယ်စပ်ရွာကလေးတွေကို မှီခိုရတာပါ”ဟု ခါမ်းပါတ်မြို့မှ ဒေသခံတစ်ဦးက ပြောသည်။ 

ကလေး – တမူးလမ်းပိုင်းကို နယ်မြေပြန်လည်စိုးမိုးနိုင်ရန် ပြီးခဲ့သည့်နှစ်ကုန်ပိုင်းတွင် စစ်တပ်က ထိုးစစ် ဆင်ခဲ့သော်လည်း တော်လှန်ရေးအင်အားစုများနှင့် တိုက်ပွဲပြင်းထန်ခဲ့ပြီးနောက် ရှေ့ဆက်မတိုးနိုင်ခဲ့ဘဲ ယခုတစ်ကြိမ် အိန္ဒိယခရီးစဉ်အပြီးတွင် တကျော့ပြန်ထိုးစစ်ဆင်လာခြင်းဖြစ်သည်။  

စစ်ခေါင်းဆောင်၏ အိန္ဒိယခရီးစဉ်အတွင်း ကြန့်ကြာနေသည့် စီမံကိန်းများဖြစ်သည့် သုံးနိုင်ငံဖြတ်ကျော် အဝေးပြေးလမ်းစီမံကိန်းနှင့်ကုလားတန်မြစ်ကြောင်းဘက်စုံသုံးစီမံကိန်းကို အရှိန်မြှင့် အကောင်အထည်ဖော်ရန် သဘောတူခဲ့ခြင်းဖြစ်သော်လည်း ထိုစီမံကိန်းနှစ်ခုနယ်မြေများကို စစ်တပ်က အပြည့်အဝ ထိန်းချုပ်နိုင်ခြင်းမရှိပေ။ 

အဝေးပြေးလမ်းစီမံကိန်းသည် မြန်မာက အလေးထားသည့် စီမံကိန်းတစ်ခုဖြစ်ပြီး အိန္ဒိယ- မြန်မာ နယ်စပ်ဂိတ်ပြန်လည်ဖွင့်လှစ်နိုင်ရန် ကြိုးပမ်းနေသည်ဟု အိန္ဒိယ သတင်းဌာန DDနှင့် အင်တာဗျူးတွင် စစ်ခေါင်းဆောင်က ပြောကြားခဲ့သည်။ 

အိန္ဒိယနိုင်ငံ မိုရေးမြို့မှတဆင့်  မြန်မာနိုင်ငံအလယ်ပိုင်းစစ်ကိုင်းတိုင်း၊ မန္တလေး၊ နေပြည်တော်၊ ကရင် ပြည်နယ်တို့ကိုဖြတ်ကျော်ပြီး ထိုင်းနိုင်ငံ မဲဆောက်မြို့အထိ ချိတ်ဆက်ထားသည့် မိုင် ၈၀၀ ကျော်ရှည်သည့် အဝေးပြေးလမ်းစီမံကိန်းတွင် စစ်ကိုင်းတိုင်းအတွင်း ကလေး- တမူးလမ်းပိုင်းနှင့် မုံရွာ- ယာကြီး- ကလေးဝ လမ်းပိုင်းတွင် တော်လှန်ရေးအင်အားစုများက နယ်မြေစိုးမိုးထားသည်။ 

ထိုလမ်းပိုင်းဖြတ်သန်းသွားသည့် ကနီမြို့နယ်တွင်လည်း စစ်တပ်က စစ်ကြောင်းထိုးနေသည်မှာ တစ်လခွဲ နီးပါးရှိနေပြီး ယာကြီး- ကလေးဝ လမ်းပေါ်ရှိ အချက်အချာကျသည့် ချောင်းမကျေးရွာတွင် စစ်တပ်က တပ်စွဲထားကြောင်း ဒေသခံများထံကသိရသည်။ 

“(စစ်တပ်ကလမ်းပိုင်းကို)မရပါဘူး။ ချောင်းမရွာကိုသာထိန်းချုပ်ထားတာပါ။ စစ်ကြောင်းကတော့ ထိုးပြီး လမ်းဘေးဝဲယာ လူနေအိမ်မီးရှို့၊ ပြည်သူတွေကိုသတ်ဖြတ်တာ လုပ်နေတာပါ”ဟု ကနီမြို့နယ် ဒေသခံတစ်ဦး က ပြောသည်။ 

စစ်တပ်ကြိုးကိုင်သည့် ရွေးကောက်ပွဲအပြီး စစ်ခေါင်းဆောင် သမ္မတရာထူးရယူပြီးနောက် တော်လှန်ရေး အင်အားစုများအားကောင်းရာ စစ်ကိုင်း၊ မကွေး၊ ပဲခူး၊ ချင်းနှင့် ရခိုင်ပြည်နယ်တို့ကို အင်အားအလုံးအရင်းဖြင့် ထိုးစစ်ဆင်ကာ လက်လွှတ်ထားရသည့်နယ်မြေများနှင့် အရေးပါသည့် လမ်းပိုင်းများကို စစ်တပ်က ပြန်လည် ထိန်းချုပ်နိုင်ရန်ကြိုးပမ်းနေသည်။