တစ်ချိန်က မြန်မာစစ်တပ်ရဲ့ ဒုဗိုလ်တစ်ဦးဟာ အခုတော့ အမျိုးသားညီညွတ်ရေးအစိုးရ (NUG) လက်အောက်က တပ်ရင်းတစ်ရင်းကို ဦးဆောင်ပြီး ပဲခူးတိုင်းမှာ စစ်ရေးလှုပ်ရှားနေတဲ့ တပ်ရင်းမှူး ဖြစ်လာပါတယ်။
အသက် ၂၅ နှစ်အရွယ် ကိုဟိန်းဟာ စစ်အာဏာမသိမ်းခင်က မြန်မာစစ်တပ်ရဲ့ ခြေလျင်တပ်ရင်းတစ်ခုမှာ ဒုဗိုလ်အဖြစ် တာဝန်ထမ်းဆောင်ခဲ့သူ ဖြစ်ပါတယ်။
ဆယ်တန်းအောင်ပြီးတော့ စစ်တက္ကသိုလ်(DSA) တက်ခဲ့တဲ့ ကိုဟိန်း ဟာ အာဏာမသိမ်းခင် လပိုင်းအလို ၂၀၂၀ နှစ်ကုန်ပိုင်းမှာ DSA ကျောင်းဆင်းပြီး စစ်တပ်အရာရှိတစ်ယောက် ဖြစ်လာတာပါ။
ဒါပေမဲ့ ၂၀၂၁ ခုနှစ် စစ်အာဏာသိမ်းမှုနောက်ပိုင်း၊ ငြိမ်းချမ်းစွာ ဆန္ဒပြနေတဲ့ ပြည်သူတွေကို စစ်တပ်က အကြမ်းဖက် ပစ်ခတ်သတ်ဖြတ်တာကို မြင်တွေ့ရတဲ့အခါ “တိုင်းပြည်ဟာ အမှောင်ခေတ်ထဲ ဝင်ရောက်သွားပြီ” ဆိုတာ သူ ခံစားခဲ့ရတယ်လို့ ဆိုပါတယ်။
ပြည်သူကို သေနတ်ပြောင်းဝလှည့်ပြီး မပစ်နိုင်တဲ့အတွက် စစ်တပ်ကို စွန့်ခွာခဲ့တဲ့ ကိုဟိန်းဟာ အာဏာဖီဆန်ရေးလှုပ်ရှားမှု (CDM) မှာ ပါဝင်ခဲ့ပြီး နောက်ပိုင်းမှာ လက်နက်ကိုင်တော်လှန်ရေးထဲ ဝင်ရောက်ခဲ့ပါတယ်။ ကရင်အမျိုးသားအစည်းအရုံး(KNU) ထိန်းချုပ်နယ်မြေတစ်ခုမှာ ပြည်သူ့ကာကွယ်ရေးတပ်မတော်(PDF) အပတ်စဉ်(၁) ကို စစ်သင်တန်းပေးခဲ့သူလည်း ဖြစ်ပါတယ်။
စစ်တပ်ကို စွန့်ခွာပြီး တော်လှန်ရေးလမ်းကို ရွေးချယ်ခဲ့တာ အခုဆို ငါးနှစ်ကျော် ရှိလာပါပြီ။ လက်ရှိမှာတော့ ကိုဟိန်းဟာ အမျိုးသားညီညွတ်ရေးအစိုးရ (NUG) လက်အောက်၊ ပဲခူးတိုင်း စစ်ဒေသအတွင်း လှုပ်ရှားနေတဲ့ နဂါးနီတပ်ရင်းရဲ့ တပ်ရင်းမှူးအဖြစ် တာဝန်ယူနေပါတယ်။
Myanmar Now သတင်းထောက်တွေက ပဲခူးတိုင်း စစ်ဒေသကို သွားရောက်ပြီး ကိုဟိန်းနဲ့ တွေ့ဆုံမေးမြန်းခဲ့ပါတယ်။
ဒီတွေ့ဆုံမှုမှာတော့ သူ့ရဲ့ ဘဝဖြတ်သန်းမှု၊ စစ်တပ်ကို စွန့်ခွာဖို့ ဆုံးဖြတ်ခဲ့ရတဲ့ အကြောင်းရင်း၊ CDM အရာရှိတစ်ယောက်အဖြစ် ယနေ့အထိ စွဲကိုင်ထားတဲ့ ခံယူချက်တွေအပြင် လက်ရှိ လက်နက်ကိုင်တော်လှန်ရေးရဲ့ ခက်ခဲကြမ်းတမ်းတဲ့ ခရီးလမ်းအကြောင်းတွေကိုလည်း မေးမြန်းထားပါတယ်။
ကိုလှိုင်း၊ စောရယ်/ Myanmar Now
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် /qurium/myanmar-now.org/mm-members.html တွင် ကူညီနိုင်ပါသည်။
