اطلاعات روز: د ننګرهار په مومندرې ولسوالۍ کې ځایي سرچینې وایي، چې د دغې ولسوالۍ په یو روغتیایي مرکز کې د طالبانو د صحت برخې د یوه مسوول له لوري یوه ښځينه ډاکټره له دلیل پرته له دندې ګوښه کړې.
یوې سرچینې د نوم نه ښودلو په شرط وویل، په مومندرې ولسوالۍ کې یوه ښځينه ډاکټره چې له ازموینې وروسته د یوې موسېسې له لوري مقرره شوې او د ننګرهار د عامې روغتیا ریاست د رسمي مکتبوب پر اساس په دنده ګمارل شوې وه، د یادې ولسوالۍ لپاره د طالبانو د صحت برخې مسوول شاه محمد شمس یې مکتوب شکولی او هغه یې له دندې شړلې ده.
سرچینه زیاتوي، چې یادې ډاکټرې نږدې دوه اوونۍ دنده هم ترسره کړې وه، خو د طالبانو د یاد مسوول له لوري په یوه او بله پلمه ځورول کېده او ورته ویل شوي و، چې ته د بهرنیانو لپاره کار کوې.
په سیمه کې یوه بله سرچینه تاییدوي چې یاده ښځينه ډاکټره له دندې ګوښه شوې او د همدې امله د روغتیایي مرکز د امر په ګډون نور پرسونل له طالبانو سره لفظي شخړه کړې او حتا طالبانو ډاکټران په مرګ ګواښلي دي.
سرچینه زیاتوي، اوسمهال په یاد روغتیایي مرکز کې یوازې یوه ښځینه نرسه کار کوي، چې د زیاتو ناروغانو له امله نه شي کولای په سم ډول روغتیایي خدمات وړاندې کړي. سرچینه دغه راز د ښځینه ډاکټرانو او کافي درملو له نه موجودیته هم شکایت لري.
بلخوا د ننګرهار د عامې روغتیا ریاست لپاره طالب ویاند نقیب الله رحیمي وایي، چې له یادې پېښې خبر دي خو د قضیې د څېړلو په موخه یې یو پلاوی استولی چې جزیات به یې وروسته له رسنیو سره شریک کړي.
دا په داسې حال کې ده چې د ننګرهار په روغتیایي مرکزونو کې څه موده وړاندې د طالبانو امربالمعروف ریاست محتسبینو له محرم پرته روغتیایي مرکزونو ته د ښځينه ډاکټرانو، نرسانو او قابله ګانو په ورتګ بندېز لګولی و.