سرچینې وايي چې د کندهار د سپین بولدک ولسوالۍ په «مازل ګلۍ» او «لقمان» کلي کې د طالبانو او پاکستاني امنیتي ځواکونو تر منځ لنډه نښته شوې چې له امله یې شپږ تنه وژل شوي او ۲۳ نور ژوبل دي.
سرچینو د نوم نه ښودلو په شرط ویلي چې دا نښته نن (پنجشنبه، ۱۵ د لړم) د ماځیګر له څه کم پنځو بجو راهیسي پیل شوې وه او تر یو څه وخته یې دوام وکړ او دواړو لورو پکې سپکې او درنې وسلې وکارولې.
سرچینې ویلي چې په سپین بولدک ولسوالۍ کې وېش بازار ته نژدې پر یوه کور د پاکستاني ځواکونو د برید له امله د «خان» په نوم یو ځوان او د هغه د کورنۍ څلور ښځې وژل شوې.
سرچینې همدا راز ویلي چې یوه بله ښځه په «وردګ» کلي کې وژل شوې او څلور نور کسان زخمیان دي.
په ورته وخت کې په سپین بولدک کې د طالبانو یوه امنیتي سرچینه وایي چې د جګړې له سیمې د خلګو د تېښتې پر مهال په ټیلو کې ۱۹ نور کسان ژوبل شوي.
بل لور ته د طالبانو ویاند ذبیح الله مجاهد هم د کندهار پر سپین بولدک ولسوالۍ د پاکستان بریدونه تایید کړي او ویلي یې دې چې دې ډلې د مذاکراتي پلاوي د درناوي او ملکي تلفاتو د مخنیوي په خاطر هیڅ ډول غبرګون نه دی ښوولی.
تر دې وړاندې اطلاعات روز ته داسې راپورونه رسېدلي وو چې په دې پېښه کې یوازې دوه کسان وژل شوي او په سپین بولدک ولسوالۍ کې طالب چارواکو هم د یوې ښځې او یوه نارینه وژنه تایید کړې وه.
دا نښته او مرګ ژوبله په داسي حال کې پېښېږي چې اوس مهال د طالبانو او پاکستان پلاوي د درېیم پړاو خبرو لپاره د ترکیې په استانبول کې د اوربند او نورو مسایلو پر سر په خبرو بوخت دي.
