د پاکستان د لومړي وزیر مرستیال او د بهرنیو چارو وزیر محمد اسحاق ډار وایي چې طالبانو په افغانستان کې د تحریک طالبان پاکستان (ټي ټي پي) تر سل زیات غړي نیولي، مګر دا کافي نه دي.
ده نن (شنبه، ۸ د لیندۍ) ویلي چې د روان لمریز کال پر مهال کابل ته د ده د سفر پر مهال د طالبانو د بهرنیو چارو وزیر امیر خان متقي ورته دا خبره کړې ده.
د پاکستان د بهرنیو چارو وزیر ویلي چې طالبانو غوښتي و چې له اسلام اباده باید یو پلاوی ورشي، تر څو دا نیونې تایید کړي.
ده ټینګار کړی چې د ټي ټي پي د عناصرو په وړاندې چې د افغانستان له خاورې فعالیت کوي، زیاتو قاطعو او پایدارو اقداماتو ته اړتیا ده.
پاکستاني چارواکو ادعا کړې چې د ټي ټي پي غړي او رهبران په افغانستان کې مېشت دي او د دې هیواد پر خلاف یې کاروي.
دوی په افغانستان کې له طالبانو غوښتي چې اجازه دې نه ورکوي چې د افغانستان خاوره د «ترهګرو» له لوري د پاکستان پر خلاف وکارېږي.
مګر طالبان ټینګار کوي چې هیڅ ډلې ته اجازه نه ورکوي چې د افغانستان خاوره د بل هیواد پر ضد وکارول شي.
دا ډله همدا راز وایي چې ټي ټي پي په افغانستان کې حضور نه لري بلکې په پاکستان کې مېشته ده او د دې هیواد یوه برخه یې تر واک لاندې ده.
