ایمرجنسي روغتون ویلي چې د کابل د نننۍ چاودنې له ځایه ۲۰ تنه چې اووه کسان پکې وژل شوي، د دې روغتون جراحي څانګې ته لېږدول شوي دي.
دې روغتون نن ماښام (دوشنبه، د جدي ۲۹مه) په یوه خبرپاڼه کې ویلي چې د وژل شویو او ټپیانو شمېر موقتي دی او کېدای شي وروسته بدل شي.
په افغانستان کې د دې روغتون مشر دژان پنیک ویلي چې په ټپیانو کې څلور ښځې او یو ماشوم هم شامل دي.
نوموړي زیاته کړې چې دې روغتون ته لېږدول شوي ځیني ټپیان د جراحۍ لپاره تر ارزونې لاندې دي.
طالبان وایي چې دا چاودنه نن تر غرمې وروسته د کابل د شهرنو د «ګلفروشي» کوڅې په یوه هوټل کې شوې ده.
په کابل کې د طالبانو د امنیې قومندانۍ ویاند هم دا چاودنه تایید کړې او ویلي یې دي چې مرګژوبله لري، خو نور جزییات یې نه دې ورکړي.
ځینو رسنیو راپور ورکړی چې د دې چاودنې هدف چینایي وګړي وو.
تر اوسه هېڅ فرد یا ډلې د دې چاودنې مسوولیت نه دی منلی.
