د ملګرو ملتونو د بشري مرستو د همغږۍ دفتر (اوچا) وايي، په افغانستان کې د جګړو پاتې شوي چاودېدونکي توکي لا هم د خلکو لپاره ورځنی ګواښ دی او د خلکو د ژوند د خوندي کولو لپاره د ماینپاکۍ پروژو دوامدار مالي ملاتړ ته اړتیا ده.
اوچا نن (چهارشنبه، د تلې ۱۵مه) د یوه راپور په خپرولو سره ویلي، چې د روان میلادي کال د جنورۍ له لومړۍ نېټې څخه د اګست تر پایه پورې د تېرو جګړو د پاتې شویو چاودېدونکو توکو د چاودنو ۷۸ سلنه قربانیان ماشومان وو.
دغه بنسټ ویلي، سره له دې چې د خطر کچه لوړه ده، خو په افغانستان کې د ماینپاکۍ پروژو مالي ملاتړ کم شوی دی.
د اوچا د راپور له مخې، د ۲۰۲۶ کال د «بشري مرستو د پلان» له مخې د اړتیا وړ ۱۴.۵ میلیونه ډالرو له ډلې یوازې ۴.۳ میلیونه ډالر برابر شوي او په دې برخه کې ۱۰.۲ میلیونه ډالره بودیجوي کسر موجود دی.
د اوچا د دفتر غړې اولګا چرفکو وايي: «افغانستان داسې ځمکې لري چې ظاهراً عادي او خوندي ښکاري، خو د ځمکې لاندې یې داسې توکي پټ دي چې ښايي د مرګ یا د بدن د غړو د پرې کېدو لامل شي.»
د نوموړې په وینا، ښايي دغه خطرناک توکي څو لسیزې وړاندې او یا هم په دې وروستیو کې ځای پر ځای شوي وي.
مېرمن چرفکو د کندهار ولایت په ژړۍ ولسوالۍ کې د ۱۹۸۰مې لسیزې د یوه بم د کنټرول شوې چاودنې په عملیاتو کې د ګډون پر مهال ویلي، چې دغه بم د شنډولو دوه ورځې مخکې د سیمې یوه اوسېدونکي موندلی و.
هغې په افغانستان کې د ماینپاکۍ ټیمونو د فعالیت دوام «ډېر مهم» بللی او ویلي یې دي، چې دغه ټیمونه د خلکو د خوندیتوب لپاره په ټول هېواد کې د څو لسیزو جګړو پاتې شوي چاودېدونکي توکي مومي او شنډوي.
چرفکو په هغه تصویري راپور کې چې اوچا خپور کړی، ویلي چې د ماینپاکۍ پروژو د مالي ملاتړ کمېدل په دې معنا دي چې خلک اړ کېږي له داسې ګواښ سره ژوند وکړي چې په سترګو یې نه شي لیدلی.
نوموړې ټینګار کړی: «د دې لپاره چې هر بزګر وکولای شي په ډاډه زړه پر خپلو ځمکو قدم ووهي او ماشومان په خوندي چاپېریال کې لوبې وکړي، دوامدار ملاتړ ته اړتیا ده، څو د جګړو ټول پاتې شوي ناچاودېدونکي توکي پاک شي.»
