په هرمز تنګي کې د یوې تېلوړونکې بېړۍ پر مهال برید شوی، چې له امله یې د بېړۍ ۱۲ تنه عمله ټپیان شوي او د عمان هوايي ځواکونو له ډلې ۱۰ تنه ټپیان تخلیه کړي دي.
الجزیرې شبکې نن (چهارشنبه، د تلې ۱۵مه) راپور ورکړی چې زیانمنه شوې «آن پیس» تېلوړونکې بېړۍ د پاناما تر بیرغ لاندې تګ راتګ کاوه.
د راپور له مخې، په دې بېړۍ کې ۱۹ تنه عمله وو چې ۱۲ تنه یې د یوه نامعلوم توغندي یا چاودېدونکي توکي د لګېدو له امله ټپیان شوي دي.
د عمان هوايي ځواکونو ویلي، چې ۱۰ تنه ټپیان یې په مسندم کې د خصب روغتون ته لېږدولي او تر درملنې لاندې دي.
د هند بهرنیو چارو وزارت په یوه اعلامیه کې ویلي، چې د تېلوړونکې بېړۍ له ۱۷ تنو عملې او ۱۱ ټپیانو څخه ټول د هند وګړي دي.
«آن پیس» تېلوړونکې بېړۍ پرون د عمان ساحلونو ته څېرمه، د «لیما» بندر په شاوخوا ۱۷ کیلومترۍ کې په نښه شوې ده.
د دې برید له امله د بېړۍ پر عرشه اور لګېدلی دی.
تر اوسه هېڅ یوې ډلې د دې برید مسوولیت نه دی منلی.
ایراني سپاه پاسداران ته نږدې فارس خبري اژانس پرون راپور ورکړی چې ایراني ځواکونو په تېره یوه اوونۍ کې ۱۳ هغه بېړۍ په نښه کړې دي چې له ایران سره له همغږۍ پرته یې غوښتل له هرمز تنګي څخه تېرې شي.
په همدې حال کې د امریکا د پوځ مرکزي قوماندانۍ (سنتکام) هم ویلي، چې په تېرو درېیو میاشتو کې یې ۱۳ بېړۍ له منځه وړې، درې بېړۍ یې له کاره غورځولې او د ۱۳۰ هغو بېړیو مسیر یې بدل کړی چې غوښتل یې د ایران بندرونو ته دننه یا ترې بهر شي.
