سرچینې اطلاعات روز ورځپاڼې ته وايي، طالبانو د «امید سبز» ښارګوټي کرایهناستو کورنیو ته ویلي چې «له هرې کوټې څلور زره افغانۍ» کرایه ورکړي.
یوه سرچینه وايي، د طالبانو د امر له مخې، کرایهناست باید د روان لمریز کال له پیل راهیسې د هرې کوټې لپاره څلور زره افغانۍ کرایه ورکړي او د راتلونکو شپږو میاشتو کرایه هم باید له مخکې ورکړي.
د سرچینې په وینا، دا په داسې حال کې ده چې طالبانو په دغه ښارګوټي کې د خپلو غړو او ځواکونو لپاره د هرې کوټې کرایه یو زر افغانۍ ټاکلې ده.
سرچینې ادعا کړې چې د طالبانو موخه دا ده چې خلک خپل کورونه خالي کړي، څو د دې ډلې ځواکونه او غړي په دغه ښارګوټي کې ځای پر ځای شي.
د طالبانو د عدلیې وزارت تر دې وړاندې د امید سبز ښارګوټي کرایهناستو کورنیو ته امر کړی و چې له دې وروسته کرایه د کورونو مالکانو ته ورنه کړي، بلکې د دغه وزارت حساب ته یې ولېږي.
سرچینې همداراز اطلاعات روز ورځپاڼې ته ویلي چې طالبان د امید سبز ښارګوټي د اوسېدونکو د «ملکیت اسنادو» کاپۍ راټولوي.
یوه سرچینه وايي، د طالبانو مامورانو نن چهارشنبه (د تلې ۱۵مه) د امید سبز ښارګوټي په «څلورم فاز» کې د خلکو د ملکیتونو د اسنادو کاپۍ راټولې کړې.
د سرچینې په وینا، د طالبانو د عدلیې وزارت د «ځمکو د غصب د مخنیوي کمېسیون» څلور کسیزه ډله، له څو وسلهوالو کسانو سره یوځای، دغه اسناد راټولوي.
سرچینې همداراز وايي چې د طالبانو ماموران په دغه ښارګوټي کې خالي کورونه «مهرولاک» کوي او د کورونو مالکانو ته بیا د هغوی د پرانیستلو اجازه نه ورکوي.
د طالبانو د عدلیې وزارت د امید سبز ښارګوټی «امارتي» اعلان کړی او د دغه ښارګوټي اوسېدونکو ته یې د کورونو د خالي کولو امر کړی دی.
«امید سبز ښارګوټی» د کابل ښار په لوېدیځ کې موقعیت لري او ډېری اوسېدونکي یې هزارهګان دي. دغه ښارګوټی په تېرو شلو کلونو کې جوړ شوی او محمدنبي خلیلي، چې د افغانستان د پخواني مرستیال ولسمشر محمدکریم خلیلي ورور دی، د دغه ښارګوټي له عمده درېیو شریکانو څخه یو دی.
محمدنبي خلیلي ویلي چې «امید سبز ښارګوټی د معتبرو شرعي قبالو، رسمي ملکیتي اسنادو، له اړوندو ادارو څخه د بشپړې تصفیې او د قانوني ودانولو جواز پر بنسټ جوړ شوی دی.»
د محمدنبي خلیلي په وینا، د امید سبز ښارګوټي ټولې ځمکې له هغو مالکانو څخه اخیستل شوې دي چې «د موجودو اسنادو له مخې، له کلونو او نسلونو راهیسې د دغو ځمکو مالکیت لري، معتبرې قبالې لري او د هغوی د مالیاتو د ورکړې سابقه تېرو څو لسیزو ته رسېږي.»
د امید سبز ښارګوټي «امارتي» اعلانېدو پراخ غبرګونونه پارولي او ډېرو کسانو دا اقدام د هزارهګانو او شیعهګانو پر وړاندې د طالبانو د «توپیري سیاستونو» په دوام کې بللی دی.
