د ملګرو ملتونو سرمنشي انتونیو ګوترېش د نړیوالې محکمې قاضیې او د ملګرو ملتونو د بشري حقونو پخوانۍ عالي کمېشنرې ناوانتم ناوی پیلای ته د نوبل د سولې جایزې ګټلو مبارکي ویلې ده.
د ملګرو ملتونو سرمنشي نن ماښام (جمعه، د تلې ۱۷مه) پر اېکس لیکلي چې مېرمن پیلای ته د دغې جایزې ورکول «د ټولو هغو کسانو درناوی دی چې د نړیوالو قوانینو، د قانون د حاکمیت او بشري حقونو د ساتنې او دفاع، او همداراز د سولې، عدالت او انساني کرامت د ټینګښت لپاره هڅې کوي.»
نوموړي د مېرمن پیلای کاري مخینې ته په اشارې ویلي چې هغې «تل دا ښودلې چې د قانون ځواک باید د زور پر قانون برلاسی شي او د بشري حقونو دفاع د بېعدالتۍ پر وړاندې تر ټولو ډاډمنه پناه ده.»
د ناروې د نوبل کمېټې نن ناوانتم ناوی پیلای د سولې او نړیوالو قوانینو د ترویج لپاره د هڅو له امله د ۲۰۲۶ کال د نوبل د سولې جایزې ګټونکې اعلان کړه.
کمېټې ویلي چې د سږ کال ګټونکې د جنګي جرمونو، د بشریت پر ضد جرمونو او نسلوژنې د عاملانو د قانوني تعقیب په برخه کې اساسي رول لوبولی دی.
ناوی پیلای د سویلي افریقا په ستره محکمه، د روانډا په نړیواله جزايي محکمه او نړیواله جزايي محکمه کې د قاضیې په توګه دنده ترسره کړې ده.
نوموړې له ۲۰۰۸ څخه تر ۲۰۱۴ کال پورې د ملګرو ملتونو د بشري حقونو عالي کمېشنره هم وه او تر دې وروستیو پورې یې د فلسطین د اشغال شویو سیمو په اړه د ملګرو ملتونو د خپلواک نړیوال څېړنیز کمېسیون مشري کوله.
مېرمن پیلای اوس د نړیوالې محکمې قاضیه ده او په هغې قضیه کې دنده ترسره کوي چې میانمار پکې په نسلوژنې تورن شوی دی.
