د امریکا د بهرنیو چارو وزارت څو ساعته وروسته له هغه نړیواله جزايي محکمه تحریم کړه چې د دغې محکمې پخوانۍ قاضۍ ناوی پیلای د نوبل د سولې جایزه وګټله.
د امریکا د بهرنیو چارو وزیر مارکو روبیو نن ماښام (جمعه، د تلې ۱۷مه) په یوه ویډیويي پیغام کې وویل: «ولسمشر ټرمپ به هېڅکله اجازه ورنه کړي چې نړیواله جزايي محکمه د امریکا اتباع تر قانوني تعقیب لاندې ونیسي. له همدې امله، متحده ایالات نن دغه محکمه تحریموي.»
هغه زیاته کړه: «موږ به له دې خپلسرې محکمې سره هر ډول معاملې منع کړو، مالي سرچینې به یې پرې کړو او زموږ پر وړاندې د اقدام کولو وړتیا به یې فلج کړو.»
د امریکا د بهرنیو چارو وزیر وویل: «زموږ پیغام روښانه دی؛ متحده ایالات او د امریکا خلک د دې جعلي محکمې تر قضايي صلاحیت لاندې نه راځي.»
مارکو روبیو وویل چې یا به نړیواله جزايي محکمه خپلو ګواښونو ته د پای ټکی کېږدي او یا به امریکا د دغې محکمې فعالیتونه پای ته ورسوي.
هغه وویل: «موږ له خپلو متحدانو، چې ډېری یې د دې محکمې غړي دي او د خپل دفاع لپاره پر امریکايي پوځیانو تکیه کوي، تمه لرو چې د دې خپلسرې محکمې مخه ونیسي؛ که نه، متحده ایالات به د دې محکمې د ګام په ګام ړنګولو خپل کمپاین ته دوام ورکړي، څو نور د امریکایانو پر وړاندې هېڅ ګواښ پاتې نه شي.»
د امریکا د حکومت له لوري د نړیوالې جزايي محکمې د تحریم پرېکړه څو ساعته وروسته له هغه وشوه چې د دغې محکمې پخوانۍ قاضۍ ناوی پیلای د نوبل د سولې جایزه وګټله.
د ناروې د نوبل کمېټې اعلان کړی چې مېرمن پیلای د سولې او نړیوالو قوانینو د ودې لپاره د خپلو هڅو له امله د نوبل د سولې جایزه ګټلې ده.
ناوی پیلای د هغه راپور څارنه هم کړې چې پکې د غزې په تړانګه کې د اسرائیلو له لوري د فلسطینیانو وژنه «نسلوژنه» بلل شوې ده.
امریکا تر دې مخکې هم د نړیوالې جزايي محکمې ځینې قاضیان او څارنوالان د خپلو پوځیانو د جنګي جرمونو په اړه د څېړنو او همداراز د اسرائیلو د لومړي وزیر بنیامین نتانیاهو او د دغه هېواد د پخواني دفاع وزیر یوآو ګالانت د نیولو د حکم د صادرولو له امله تحریم کړي وو.
