په فرانسه کې مېشته افغانې ورزشکارې ذکیې خدادادي د «پاریس ۲۰۲۶ پاراتکواندو ګرانډ پری» په سیالیو کې د سپینو زرو مډال وګاټه.
دغه سیالۍ د جمعې په ورځ (د میزان ۱۷مه) د فرانسې په «لووالوا پرې» ښار کې ترسره شوې.
۲۸ کلنې ذکیې خدادادي د ښځو په منفي ۴۷ کیلوګرامه وزن کې سیالي وکړه او له دوو بریاوو وروسته پایلوبې ته ورسېده.
ذکیې په پایلوبه کې د مکسیکو سیالې، کلودیا رومېرو ته ماتې وخوړه او د سپینو زرو مډال یې خپل کړ.
خدادادي په انسټاګرام کې په یوه پیغام کې ویلي، چې دې مقام ته پر رسېدو ویاړي.
هغې لیکلي: «پرلهپسې مډالونه مې زما د مقاومت، مبارزې او نه تسلیمېدو نښه ده.»
ذکیې زیاته کړې، چې هغه یوازې د ځان لپاره مبارزه نه کوي، بلکې د هغو زرګونو افغان ښځو غږ هم دی چې له ټولو محدودیتونو سره سره لا هم خوبونه لري او د ازادۍ او برابرۍ لپاره مبارزه کوي.
هغې تېره میاشت د پاراتکواندو په نړیوالو «ګرانډ پری» سیالیو کې د برونزو مډال ګټلی و.
په داسې حال کې چې په افغانستان کې طالبان ښځو ته د ورزش اجازه نه ورکوي، هغه ښځینه ورزشکارانې چې کډوالې شوې دي، په نړیوالو ډګرونو کې د پام وړ لاستهراوړنې لري او خپل مډالونه تل د افغانستان ښځو ته ډالۍ کوي.
ذکیه خدادادي له دغو ځوانو ښځینه ورزشکارانو څخه ده. هغې په پاراتکواندو کې په تېرو دریو کلونو کې دوه ځله د اروپا اتلولي ګټلې او د پاریس ۲۰۲۴ پارالمپیک سیالیو کې یې د افغانستان د لومړۍ ښځینه ورزشکارې په توګه مډال ترلاسه کړ.
