د پاکستان صدراعظم شهباز شریف یو ځل بیا د طالبانو حکومت تورن کړی چې د وسلهوالو ډلو له ملاتړ او هغوی ته له پناه ورکولو لاس نه اخلي او ادعا یې کړې چې طالبان د «پردیو په لاس لوبېږي».
شهباز شریف د یکشنبې په ورځ د کابینې په غونډه کې وویل، چې په خیبر پښتونخوا او بلوچستان کې د ناامنیو تر شا هغه وسلهوال لاس لري چې د نوموړي په وینا، له افغان خاورې بریدونه پلانوي او ترسره کوي.
هغه زیاته کړې، چې پاکستان د ترکیې، قطر او چین په ګډون د دوستو هېوادونو له لارې هم هڅې کړې، څو طالبان د پاکستان اندېښنې درک کړي، خو په خبره یې، تر اوسه یې دې هڅو پایله نه ده ورکړې.
د پاکستان صدراعظم دا څرګندونې د شنبې په ناوخته د پکتیا د ډنډ پټان ولسوالۍ او د پاکستان د کورمې سیمې ترمنځ د ډیورند کرښې ته څېرمه د طالبانو او پاکستاني ځواکونو له نښتې وروسته کړې دي.
د طالبانو ۲۰۳ منصوري قول اردو ویلي، چې نښته وروسته له هغه پیل شوه چې پاکستاني ځواکونو ډزې وکړې او افغان ځواکونو ځوابي ډزې وکړې.
د پاکستان پوځ بیا په یوه بیان کې د خپل یوه افسر، هدایت امان، وژل کېدل تایید کړي او ادعا یې کړې چې ۱۲ پاکستاني او افغان طالبان یې هم وژلي دي.
د پاکستان ولسمشر اصف علي زرداري هم د خپل افسر پر وژل کېدو خواشیني څرګنده کړې او د طالبانو حکومت یې د وسلهوالو ډلو په ملاتړ او تمویل تورن کړی دی.
هغه خبرداری ورکړی، چې پاکستان نه یوازې د وسلهوالو ډلو غړي، بلکې د نوموړي په وینا، د هغوی ملاتړي هم له منځه وړلی شي.
د پاکستان د ولسمشر او صدراعظم د دغو څرګندونو په اړه د طالبانو حکومت تر اوسه تازه غبرګون نه دی ښودلی.
خو د طالبانو د بهرنیو چارو وزیر امیرخان متقي تېره اوونۍ د مسکو فارمټ په غونډه کې ویلي وو، چې پاکستان په افغانستان کې په بمباریو سره ملکي وګړي او بېګناه افغانان وژني.
هغه د پاکستان پوځي سیاست د پاکستان، افغانستان او ټولې سیمې په ګټه نه دی بللی او ادعا یې کړې وه، چې پاکستان په تېرو پنځو کلونو کې څو ځله پر افغانستان بمبارۍ کړې دي.
د طالبانو حکومت تر دې وړاندې هم پاکستاني چارواکي تورن کړي چې د خپلو ناکامیو پړه پر طالبانو اچوي.
