Bu gün Bakı Ağır Cinayətlər Məhkəməsində “Azərbaycan Beynəlxalq Bankı” ASC-nin “Qaradağ” filialının kredit şöbəsinin külli miqdarda dələduzluqda təqsirləndirilən sabiq baş mütəxəssisi Elnur Hüseynovun cinayət işi üzrə məhkəmə prosesi davam etdirilib.
Hakim Azad Məcidovun sədrliyi ilə keçirilən prosesdə şahid qismində “Beynəlxalq Bank”ın Qaradağ rayon filialının baş mühasibi Kamilə İslamova ifadə verib. O bildirib ki, E. Hüseynov verdiyi kreditlərə zamin dayana bilməzdi.
Hakim A. Məcidov isə istintaq materiallarında təqsirləndirilən E. Hüseynovun bir neçə şəxsə kredit verərkən zaminlik etdiyini xatırladıb: “Bu necə ola bilər ki, kredit verən şəxs özü zamin dayanıb? Deməli, o, bu cibindən çıxarıb, o biri cinibə qoyur”.
Şahid isə cavabında yalnız gətirilən sənədlərə imza atdığını və bundan xəbərsiz olduğunu deyib.
Hakim kredit rəyi haqqında qərarın 2014-2015-ci illərdə nə üçün sənədləşdirilməməsinin səbəbini şahiddən soruşub.
Şahid isə “bilmirəm” – deyə cavab verib.
Proses avqustun 2-də davam etdiriləcək.
İttihama görə, E. Hüseynov qulluq mövqeyindən istifadə edərək, 5 yanvar 2012-ci ildən 28 avqust 2015-ci ilədək “Azərbaycan Beynəlxalq Bankı” ASC-nin “Qaradağ” filialının kredit şöbəsinin baş mütəxəssisi vəzifəsində işləyərkən ayrı-ayrı şəxslərə müraciət edərək, işlədiyi bank filialından kredit rəsmiləşdirməsinə razı salıb, kredit üzrə əsas və faiz borclarının özünün ödəyəcəyini deyərək, onlara yalandan vəd verib. O, Məmmədova Səmra Orxan qızının kredit qovluğundakı sənədlərdə sonuncunun imzasını oxşadıb icra etməklə 3 min manat, Hüseynova Qumru Orxan qızı, Əzizov Azan Mahir oğlu, Qaçayev Aydın Qaçay oğlu, Qəhrəmanov Elçin Rəşid oğlu, Cavani Mehdi Hicran oğlunun hər birinin adına eyni qaydada 3 min manat kredit rəsmiləşdirərək, götürüb. Eyni qaydada zərərçəkmiş Elduz Rzayevin adına 10 min manat, Qəzənfər İsgəndərovun adına isə 7 min manat kredit götürərək, dələduzluq edib.
Ona qarşı Cinayət Məcəlləsinin 178.3.2 (dələduzluq külli miqdarda törədildikdə) maddəsi ilə cinayət işi başlanıb. (apa)
Oxunub: 132
