Adam canını qoymağa yer tapmır. Qorxu, səksəkə, ümüdsüzlük və təlaş həyat tərzimizə çevrildi.
Biz müstəqillik arzusu ilə ortaya çıxanda belə bir ölkə arzulamamışdıq. Arzularımızdakı Azərbaycan dövlətinin vətəndaşı təəbə kimi yaşamalı deyildi. Nə yazıq ki, biz milli dövlət qura bilmədik.
Ölkə idarəolunmaz haldadır. Iqdisadi-siyasi böhran dərinləşməkdədir. Torpaqlar işğaldan azad edilmədi. Üstəlik neft erası da bitdi. Və kronovirus bəlası da bir tərəfdən üstümüzə gəlir…. Hələ də hökumət bu fors-major vəziyyətin günahını milli-demokratik düşərgədə axtarır.
Bu gün ölkədə 1937-ci ilin abı-havasına uyğun vəziyyət yaradılır. Həmin illərdə SSRI-nin bütün ərazisi boyu ,,troyka” kimi tanınan cəza dəstələri fəaliyyət göstərirdi. Həmin üçlük məhkəməsiz və dəlil-subutsuz antisovet hesab etdiyi şəxsləri güllələmək hüququna malik idi. Hər rayonda bir ,,troyka” yaradılmışdı. Günahlandırılan şəxsi yerindəcə güllələmək səlahiyyəti var idi.
Tutaq ki, bir nəfəri günahkar hesab edirdilər. Troyka üzvü olan 3 nəfərdən 2-si öldürülməsini məqbul hesab edirdisə, həmin şəxsi yerindəcə öz silahları ilə də güllələyirdilər.
Gənc nəsil bəlkədə bu tarixi fakta inanmayacaq. Lakin 80-ci illərin sonlarında Kürdəmir rayonu üzrə ,,Troykanın” üzvü olmuş şəxsi gözlərimlə görmüşəm.
Azərbaycan yavaş-yavaş 37-ci ilə yaxınlaşır. Istənilən vaxt Azərbaycanın Respublikasının vətəndaşını həbs etmək mümkündürsə, niyə də ,,Troyka” layihəsinə yenidən baxılmasın ? Məncə belə daha yaxşı olardı. Əziyyət çəkib 3 ay qəti imkan tədbiri seç, istintaq tədbirləri apar və həbsə yolla. Çox əziyyətli və yorucu prosesdir. Ən uğurlusu Stalinin qurduğu sistemdir. Adam yoxdursa, demək problem də yoxdur. Yerindəcə güllələ hər şey bitsin.
Hesab edirdim ki, ölkəmizin böhranlı vəziyyətində hakimiyyət xalqı birləşdirmək üçün uğurlu layihə ortaya qoyacaq. Ən azından kronovirus fəlakəti müxalifət-iqtidar tanımır. Tam erməni bəlası kimi üstümüzə gəlir. Ikitərəfli fəlakət də bizi birləşdirə bilmədi. Heç olmasa bəla sovuşana qədər də olsa….
Dəhşətlidir… Deməyə söz tapmıram….
Tanrı bu bədbəxt günə günə salınmış xalqı qorusun….
İlqar Atabəyli