Elnur Sadıqov
Elmar Məmmədyarovun Minsk qrupu həmsədrləri və ermənistanlı həmkarıyla son görüşü sülh danışıqları yox, kapitulyasiya danışıqlarıydı. Görüşdən sonra Ermənistan XİN – nin verdiyi bəyanat da qondarma DQR – i dövlət kimi tanımağa mətnaltı çağırışdan başqa bir şey deyil.
İlham Əliyev deyir ki, geosiyasi şərait Azərbaycana imkan vermir ki, hərbi gücə əl atsın. Özünün 17 illik xarici siyasətinin uğursuzluğunu isə etiraf etmək istəmir. Onun yerinə başqası olsaydı, buna görə çoxdan istefaya gedərdi.
Hərbi güc imkanları yoxdursa, o zaman Əliyev azacıq qətiyyət nümayiş etdirib diplomatik hücuma keçsin. Məsələn, Ermənistanı və onun havadarlarını Azərbaycanın “Avropada Adi Silahlı Qüvvələr haqqında Müqavilə” və “Təhlükəsizlik və Etimad Quruculuğu Tədbirlərinə dair Vyana Sənədi”ndən çıxacağıyla hədələsin. Bu haqda müzakirələrə başlasın.
Adı çəkilən müqavilələrdən çıxmaqla Azərbaycan özünün hərbi potensialını indikindən daha çox artıra,Ermənistanla silahlanma yarışını dərinləşdirə, Ermənistanın borclanmasını genişləndirə bilər.
İlham Əliyev anlamalıdır ki, onun qeyri – çevik, maymaq xarici siyasəti və apardığı “ sülh danışıqları “ təslimiyyətə xidmət edir. Oturub gözləmək yox, nəsə etmək lazımdır.