AXCP RH üzvü Fuad Qəhrəmanlı
Çirkli pullarln yuyulmasını eşitmişdik, ancaq korrupsiya ilə çirklənmiş dövlət orqanlarının “yuyulmasını” da görməkdəyik.
Yuyulma deyəndə ki, bu heç də təmizlənmə anlamına gəlməməlidir. Neçə vaxtdır görürük ki, yeni bir kampaniya başladıblar. Nazirkiklərdə DTX əməliyyat keçirib bir- iki şöbə müdirini həbs edir, bununla da sanki, o nazirliyə təmizlik sertifikatı verilir. Guya ki, hər nazirlikdə korrupsiya ilə, ancaq həbs olunan bu şöbə müdirləri, 3-cü, 4-cü dərəcəki şəxslər məşğul olurmuş.
Əvvəl Mədəniyyət və Turizm nazirliyində əmliyyat keçrildi və şöbə midirləri həbs olundu. Halbuki, o zamankı Nazir Əbülfəz Qarayevin Londonda çoxmilyonluq sərvəti ortaya çıxmışdı. Sonra Dövlət Sərhəd xidmətində DTX əməliyyat keçirdi, üçüncü dərəcəli şəxs həbs olundu. Halbuki həm ərəfədə Xidmətin rəisi Elçin Quliyevin korrupsiya yolu ilə əldə olunan əmlakı barədə faktlar sosial şəbəkələrdə müzakirə olunurdu. Bundan sonra növbə XİN ə çatdı. Bu dəfə də Nyu-Yorkda 4,2 milyon dollara ev alan nazir Elmar Məmmədyarova gözün üstə qaşın var deyən olmadı, ancaq nazirliyin şöbə müdiri həbs olundu.
İndi gözləmək olar ki, növbə Dövlət Neft Şiirkətinindir. Rövnəqin oğlunun 2 milyonluq saat məsələsinə görə əməliyyat keçirib, bir şöbə müdiri tutacaqlar və bunula da Rövnəq də, SOCAR da korrupsiyadan “arındırılacaq.”
Halbuki, orta məktəb şagirdinə də aydındır ki, həbs olunan şəxslər korrupsiya məsələsində nazirlərin tapşırıqlarını icra edənlərdir.
Bundan əvvəl, eyni kampaniya İcra Hakimiyyətləri ilə bağlı olmuşdu. 5 icrabaşı həbs olunmuşdu və bununla da guya bu sahəni korrupsiyadan arındırı təmizlədilər.
Ancaq nə dəyişdi? Dəyişən heç nə olmadı. Yenə də də bütün icrabaşılar və onların ətrafı eyni prinsiplə işləyir.
Sistem islahatlarına getmədən, bu cür “təmizləmə ayinləri” heç bir nəticə verməyəcək. Əksinə, cəmiyyət görür ki, bir neçə əhmiyyətsiz fiqurları qurban vermək hesabına, korrupsiya mexanizmi və şəbəkəsini komfulyaj edib qorumağa çalışırlar.