Milli Şuranın sədri Cəmil Həsənli
Deməli bir neçə gün əvvəl İlham Əliyevin Mingəçevirdə Hərbi hissə zabitləri qarşısında çıxışına “Azad söz” kanalında münasibət bildirmişəm. Bilirsiniz ki, həmin çıxışda İlham Əliyev müxalifətin əleyhinə təhqiramiz ifadələr səsləndirmiş, Paşinyanla bağlı demişdi ki, Ermənistanda korrupsiyanın baş alıb gedir, qanunverici və məhkəmə orqanlarının bir əldə toplanıb, arvadının adına fond açıb, iş adamlarını ora pul köçürməyə məcbur edir, sonra da bu pulları çəkib yeyirlər, Ermənistanda repressiyalar geniş xarakter alıb və sair. Mən qeyd edilən çıxışımda demişdim ki, bütün bu məsələlərə görə Paşinyan İlham Əliyevdən çox təmiz adamdır, təmiz ölkə başçısıdır. Yeri gəlmişkən xalqın nifrət püskürəcəyini anlayıb İlham Əliyevin həmin çıxışının aşağısında şərh bölümünü bağlamışdılar.
Hökumət saytları bununla bağlı geniş kampaniyaya başlayıb və “Professorun Paşinyan sevgisi və Milli Şura adlı şər-şəbədə yuvası” adlı yazılar dərc edir, postlar qoyurlar. Amma hökumət mirzələri burada mənim fikrimə bir balaca əl gəzdirib onu bu hala salıblar ki, guya mən demişəm ki, Ermənistanın baş naziri “çox təmiz adamdır”. Və hökumət qələmkeşləri mənim səsləndirdiyim “İlham Əliyevlə müqayisədə Paşinyan təmiz adamdır” ifadəsindən “İlham Əliyevlə müqayisədə” sözlərini çıxarıb ona ayrı rəng verməyə cəhd göstərirlər.
İndi keçək bu məsələ ilə bağlı Əliyev xanədanının qapı qullarının ictimai rəyə təsir imkanları ilə, onların “şər-böhtan yuvası” adlandırdıqları Milli Şuranın ictimai dəstəyinə. Bizim 5 gün öncə etdiyimiz həmin çıxışa 207 min baxış və 11 minə yaxın bəyənmə olub. Hökumət saytlarında bu məsələ ilə bağlı yazılmış yazının 9, eyni məzmunlu postun isə 21 bəyənməsi olub. Bax, fərq nə az, nə çox bu qədərdir. Hökumət anlamır ki, missiyası dərə dibinə yuvarlanmaqdan ibarət olan bu saytlar rejimi də özləri ilə dərə dibinə sürüyürlər. Vur-tut 9 nəfər bəyənməsi olan sayta və yazı müəlliflərinə pul verməyə dəyərmi? Atalar demiş: Axsaq atın kor nalbəndi olar!